గేటెడ్ కమ్యూనిటీల్లో పిల్లలను మాయ చేస్తున్న మహిళ? వైరల్ సందేశం తప్పుడు: పోలీసులు

హైదరాబాద్: నగరంలోని గేటెడ్ కమ్యూనిటీల్లోకి ఓ మహిళ వెళ్లి పిల్లలకు చాక్లెట్లు చూపిస్తూ మాయ చేస్తోందని ప్రచారం అవుతున్న వాట్సాప్ సందేశం పూర్తిగా తప్పుడు అని హైదరాబాద్ సిటీ పోలీసులు స్పష్టం చేశారు.

పోలీసులు జారీ చేసిన సూచనలో అలాంటి సంఘటనలు గానీ, గ్యాంగులు గానీ నగరంలో ఎక్కడా నమోదు కాలేదని తెలిపారు. “పిల్లలను మాయ చేయడానికి మహిళ ప్రయత్నిస్తోందన్న సందేశం పూర్తిగా అసత్యం. అలాంటి ఘటనలు గానీ, గ్యాంగులు గానీ నమోదు కాలేదు” అని పేర్కొన్నారు.

నివాస సమితుల్లో విస్తరించిన వదంతి

వాట్సాప్, రెసిడెన్షియల్ వెల్ఫేర్ అసోసియేషన్ గ్రూపుల్లో ఈ సందేశం విస్తృతంగా షేర్ అయింది. 20 ఏళ్ల మహిళ గేటెడ్ కమ్యూనిటీల్లోని పిల్లలను లక్ష్యంగా చేసుకుంటోందని అందులో పేర్కొన్నారు. కృత్రిమ మేధతో రూపొందించిన ఆన్‌లైన్‌లో వైరల్ అవుతున్న మెసేజ్ లో AI రూపొందించిన పోస్టర్ విస్తృతంగా షేర్ అవుతోంది.

ఆ సందేశంలో అపార్ట్మెంట్ సముదాయాల పేర్లు కూడా చేర్చారు. అపర్ణా జికాన్, మ్యాప్స్కో కాసాబెల్లా, సాఫైర్ 83, రెయిన్‌బో విస్టాస్ పీ2, కాండెర్ ల్యాండ్‌మార్క్ వంటి సముదాయాలను ప్రస్తావించారు. వీటిలో కొన్ని హైదరాబాద్‌లో ఉండగా, మరికొన్ని బెంగళూరు, గురుగ్రామ్‌లో ఉన్నాయి.

పేర్కొన్న సముదాయాల నివాసితులు, ప్రతినిధులు అలాంటి ఘటన ఏదీ జరగలేదని తెలిపారు. రెయిన్‌బో విస్టాస్ వెల్ఫేర్ అసోసియేషన్ కూడా ఆరోపణలను ఖండించింది.

ఆందోళనకు లోనవ్వొద్దు: సీపీ సజ్జనార్

హైదరాబాద్ పోలీస్ కమిషనర్ వి.సి. సజ్జనార్ ఈ ప్రచారాన్ని అసత్యంగా అభివర్ణించారు. నిర్ధారణ లేని సందేశాలను నమ్మకూడదని, ఫార్వర్డ్ చేయకూడదని పౌరులను కోరారు.

“ఆందోళన కలిగించే నిర్ధారణ లేని సందేశాలను నమ్మవద్దు. చట్టాన్ని చేతుల్లోకి తీసుకోవద్దు. అనుమానాస్పద సమాచారం గమనిస్తే పోలీసులకు తెలియజేయండి. మేము నిజానిజాలు నిర్ధారించి చర్యలు తీసుకుంటాం. ఫార్వర్డ్ సందేశాలపై కాదు, అధికారిక సమాచారంపై నమ్మకం ఉంచండి” అని ఎక్స్‌లో చేసిన పోస్టులో సజ్జనార్ పేర్కొన్నారు.

ఎవరైనా అనుమానాస్పద వ్యక్తి లేదా కదలికలు గమనిస్తే సమీప పోలీస్ స్టేషన్‌కు వెంటనే సమాచారం ఇవ్వాలని పోలీసులు సూచించారు. అధికారులు వాస్తవాలు పరిశీలించి తగిన చర్యలు తీసుకుంటామని తెలిపారు.