Godavari Pushkarams : గోదావరి పుష్కరాలకు తేదీల నిర్ణయం.. వెయ్యి కోట్ల రూపాయలతో అభివృద్ధి పనులు

2015 లో ఇదే గోదావరి పుష్కరాల ప్రారంభం వేళ చోటు చేసుకున్న ఘటనలు దృష్టిలో ఉంచుకొని అందరూ ఒకే ఘాట్‌లో స్నానాలు చేసే అవసరం లేకుండా గోదావరి నదిలో ఎక్కడైనా స్నానాలు చేయొచ్చని ప్రచారం చేయనుంది. గోదావరి జిల్లాల్లో పుష్కర ఘాట్ల అభివృద్ధికి అధికార యంత్రాంగం దాదాపు 94 కోట్ల రూపాయలతో ప్రతిపాదలు సిద్దం చేసింది. కేంద్ర ప్రభుత్వం ముందస్తుగానే గోదావరి పుష్కరాల కోసం ఇప్పటికే వంద కోట్ల రూపాయల నిధులను కేటాయించింది. రైల్వే శాఖ పుష్కరాలకు వచ్చే భక్తుల సౌకర్యాల కల్పన కోసం రాజమండ్రి రైల్వే స్టేషన్ కు 271.43 కోట్ల రూపాయలు కేటాయిస్తూ నిర్ణయం తీసుకుంది. అలాగే యాత్రికులు బస చేసేందుకు తాత్కాలిక టెంట్లను మహా కుంభమేళా తరహాలో చేయాలని కూడా భావిస్తుంది.

దేశంలో ప్రధాన ప్రాంతాల నుంచి రాజమండ్రికి ప్రత్యేక రైళ్లు నడిపేందుకు రైల్వే శాఖ సిద్ధమయింది. ముందస్తుగానే వాటి వివరాలు వెల్లడిస్తామంటున్న అధికార యంత్రాంగం టిక్కెట్లు కూడా ముందు నుంచి బుక్ చేసుకోవడానికి వీలుగా ప్రకటించనుంది. గోదావరి తీరంలో ఎన్ని పుష్కర్ ఘాట్లు ఏర్పాటు చేయాలన్న దానిపై అధ్యయనం చేయనున్నారు. ఆ ప్రాంతంలో ఉన్న ఆధ్యాత్మిక విశిష్టతను అనుసరించి ఘాట్ లను ఏర్పాటు చేయడమే కాకుండా ఆ ఘాట్లలో అవసరమైన రవాణా సౌకర్యాన్ని కూడా ఏర్పాటు చేయాలని ప్రభుత్వం నిర్ణయించింది. అందరూ రాజమండ్రికి కాకుండా మిగిలిన ప్రాంతాలకు కూడా వెళ్లేలా ప్రచారం కల్పించేందుకు ముందస్తు నుంచే చర్యలు తీసుకోవాలని నిశ్చయించింది.