Telangana : కల్యాణ మస్తుకి అర్హతలివే.. తులం బంగారం.. లక్ష నగదు ఎవరికో తెలుసా?

అయితే తాజాగా మంత్రి దుద్దిళ్ల శ్రీధర్ బాబు త్వరలోనే కల్యాణ లక్ష్మిని అమలు చేస్తామని ప్రకటించారు. అయితే దీనికి ఎవరు అర్హులు? ఎవరికి తులం బంగారం, లక్ష రూపాయల నగదు వస్తుంది? దీనికి డెడ్ లైన్ ఏమైనా ఉందా? లేకపోతే పథకం ప్రకటించిన తర్వాత మాత్రమే వివాహమయిన వారికి అర్హులుగా ఉంటారా? అన్నది ఇంకా క్లారిటీ లేదు. కల్యాణ లక్ష్మి పథకం పేరును కల్యాణమస్తుగా మారుస్తూ ప్రభుత్వం నిర్ణయం తీసుకుంది. వరసగా పెళ్లిళ్లు సీజన్లు పూర్తవుతున్నాయి. కానీ కల్యాణమస్తు పథకం మాత్రం ఇంత వరకూ అమలుకు నోచుకోలేదు. ఇందుకోసం 1,450 కోట్ల రూపాయలను ఖర్చవుతుందని అధికారులు ప్రాధమికంగా అంచనా వేసినట్లు తెలిసింది. అంటే ఈ సీజన్ లోనే అమలు చేసేందుకు ప్రభుత్వం సిద్ధమవుతున్నట్లు తెలిసింది.

ఆరు గ్యారంటీలు అమలు కాలేదని విపక్షాలు విమర్శలు చేస్తున్న నేపథ్యంలో కల్యాణ మస్తు పథకాన్ని గ్రౌండ్ చేయాలని ముఖ్యమంత్రి రేవంత్ రెడ్డి కూడా నిర్ణయించారని తెలిసింది. ఈ మేరకు నిధులను సమీకరించాలనిఆర్థిక శాఖ అధికారులకు పురమాయించారని చెబుతున్నారు. అయితే ఈ ఏడాది మాత్రమే పెళ్లయిన జంటలకు మాత్రమే ఈ పథకం వర్తించేలా నిర్ణయం తీసుకునే అవకాశముంది. రెండేళ్ల నుంచి జరిగిన వివాహాలకు కల్యాణమస్తు పథకం వర్తింప చేయాలంటే నిధుల సమీకరణ సాధ్యం కాదు. అందులోనూ తెలుపు రంగు రేషన్ కార్డులున్న వారికి మాత్రమే కల్యాణ మస్తు పథకం అమలు చేయాలని ప్రాధమికంగా నిర్ణయించారని చెబుతున్నారు. మార్గదర్శకాలు త్వరలోనే విడుదల కానున్నాయి.