Telangana : రేషన్ కార్డులకు అర్హులు ఎందరో తెలుసా? అందులో మీ పేరుందా? తెలుసుకోవాలంటే?

తెలంగాణలోని కాంగ్రెస్ ప్రభుత్వం కొత్త రేషన్ కార్డులను మంజూరు చేయడానికి అంతా సిద్ధం చేసింది. గ్రామ సభలను నిర్వహించి వారి నుంచి అర్జీలను తీసుకున్న తర్వాత అర్హులను నిర్ణయించింది. కొత్త రేషన్ కార్డు దారులను ఎంపిక చేయడం ద్వారా వారికి అన్నీ ఉచితాలతో పాటు ప్రభుత్వ సంక్షేమ పథకాలు కూడా ఇక నుంచి అందనున్నాయి. కొత్త రేషన్ కార్డు దారులందరికీ వారికి సంబంధించిన కార్డులను ఈ నెలాఖరులోపు అందనిరీ మంజూరు చేయాలని ప్రభుత్వం అధికారులను ఆదేశించడంతో అధికారులు యుద్ధ ప్రాతిపదికన ఈ కార్యక్రమాన్ని చేపట్టారు. రేషన్ కార్డుపై ఆరు కిలోల సన్న బియ్యాన్ని పంపిణీ చేయనుండటంతో కొత్తగా ప్రయోజనం పొందే వారిసంఖ్య కూడా ఎక్కువగా ఉంటుంది. కుటుంబంలో నలుగురు సభ్యులుంటే నెలకు ఇరవై నాలుగు కిలోల సన్నబియ్యం అందుతాయి.

సన్నబియ్యంతో పాటు ఇక ఆరోగ్య శ్రీ పథకం కూడా తెలుపు రంగు రేషన్ కార్డుదారులకు వర్తింప చేయడంతో వైద్య సాయం కూడా అందుతుంది. దీంతో పాటు ఐదు వందలకే గ్యాస్ సిలిండర్లు, ఇందిరమ్మఇళ్లు, ఉచిత విద్యుత్తు వంటి పథకాలు కూడా అందుతుండటంతో తెలుపు రంగు రేషన్ కార్డులకు తెలంగాణలో డిమాండ్ ఏర్పడింది. . గ్రామసభల ద్వారా మాత్రమే కాకుండా మీ సేవ కేంద్రాల ద్వారా కూడా లక్షల సంఖ్యలో ప్రజలు కొత్త రేషన్ కార్డుల కోసం దరఖాస్తు చేసుకున్నారు. గత పదేళ్ల నుంచి తమకు రేషన్ కార్డు లేదని, తమ ఆర్థిక పరిస్థితిని చూసి అందించాలని వారు అధికారులను కోరుతున్నారు. ప్రభుత్వం కూడా అర్హులైన పేదలు ఎంత మంది ఉన్నా అందరికీ తెలుపు రంగు రేషన్ కార్డులు అందచేస్తామని తెలిపింది. దీంతో కుటుంబంలో ఎంతమంది సభ్యులున్నా, వారు పెళ్లిళ్లయి బయటకు వెళ్లిపోయినా వారి పేరు మీద కూడా కొత్త రేషన్ కార్డును మంజూరు చేయనున్నారు. మొత్తం మీద ఎల్లుండి నుంచి ఇక రేషన్ కార్డుల మంజూరు ప్రక్రియ ప్రారంభం కానుండటంతో అర్హులెవరన్నది జనంలో ఉత్కంఠగా మారింది.