తెలంగాణలో ఒమిక్రాన్ వ్యాప్తి పై హెల్త్ డైరెక్టర్ కీలక ప్రకటన

ప్రపంచ వ్యాప్తంగా ఒమిక్రాన్ కేసులు నమోదవుతున్న వేళ తెలంగాణ ప్రభుత్వం విదేశాల నుంచి వచ్చే ప్రయాణికులపై నిఘా పెట్టింది. వచ్చినవారికి వచ్చినట్లు కోవిడ్ పరీక్షలు చేసి నెగిటివ్ ఉంటేనే ఇళ్లకు పంపుతున్నారు. పాజిటివ్ వచ్చినవారిని టిమ్స్ ఆస్పత్రికి తరలిస్తున్నారు. కాగా.. తెలంగాణలో ఇప్పటి వరకు ఒమిక్రాన్ కేసులు నమోదు కాలేదని ప్రజారోగ్య శాఖ సంచాలకులు డాక్టర్ శ్రీనివాసరావు ప్రకటించారు. కోవిడ్ ఫస్ట్ వేవ్ లో చాలా మంది భయంతో ఆస్పత్రుల్లో చేరి ప్రాణాలు కోల్పోయారని గుర్తుచేశారు. ఇప్పుడు కూడా తెలంగాణలో ఒమిక్రాన్ కేసులు నమోదయ్యాయని ఎవరో అసత్య ప్రచారం చేస్తున్నారని, ఇలాంటి తప్పుడు వార్తలను, పుకార్లను ప్రజలు నమ్మరాదని విజ్ఞప్తి చేశారు.