Revanth Reddy : వైఎస్ బాటను రేవంత్ ఎంచుకుంటున్నట్లుందిగా?

రేవంత్ రెడ్డి కాంగ్రెస్ లో ఎదురులేని నాయకుడిగా ఎదుగుతున్నట్లు కనిపిస్తుంది. 2004లో అప్పటి ఉమ్మడి ఆంధ్రప్రదేశ్ లో పదేళ్ల పాటు అధికారానికి నోచుకోని కాంగ్రెస్ ను ఒంటిచేత్తో వైఎస్ రాజశేఖర్ రెడ్డి గెలిపించారు. అలాగే పార్టీ నాయకత్వంపైన కూడా వైఎస్ పట్టు సాధించగలిగారు. ఇప్పుడు రేవంత్ కూడా వైఎస్ తరహా మార్క్ లోనే పయనిస్తున్నట్లు అర్థమవుతుంది. ఢిల్లీ పర్యటనలో మీడియాతో నేనే రాజు.. నేనే మంత్రి అన్న వ్యాఖ్యను నిజం చేసి చూపించారు. ఏ ఎన్నికలైనా ముఖ్యమంత్రి హోదాలో జిల్లాలను, నియోజకవర్గాలలో సుడిగాలి పర్యటనలు చేస్తూ ప్రజలను కాంగ్రెస్ వైపు తిప్పుకునేలా చేయగలిగారు. సహజంగా కాంగ్రెస్ లో అసంతృప్తుల బెడద ఉంటుంది. అలాంటివి పెద్దగా లేకుండా చేసుకోవడంతో రేవంత్ సగం ఎన్నికలకు ముందే సక్సెస్ అయ్యారని చెప్పాలి. అక్కడక్కడకొంత రెబల్స్ ఉన్నప్పటికీ ఈ ఫలితాలతో వారు దారికి రాక తప్పదు.

రేవంత్ రెడ్డి ముఖ్యమంత్రి అయిన తొలి నాళ్లలో సీనియర్ నేతల నుంచి కొంత వ్యతిరేకత ఎదురైంది. అయితే, తన వ్యూహాలతో వారిని తన దారిలోకి తెచ్చుకోవడంలో ఆయన విజయం సాధించారు. కోమటి రెడ్డి రాజగోపాల్ రెడ్డి వంటి నేతలు రేవంత్ నాయకత్వంపై అభ్యంతరాలు వ్యక్తం చేస్తున్నప్పటికీ ఆయనను ఇప్పుడు ఎవరూ పట్టించుకోవడం లేదు. ఆయన అన్న కోమటిరెడ్డి వెంకట్ రెడ్డి వంటి సీనియర్లు కూడా రేవంత్‌ను సమర్థించడం మొదలుపెట్టారు. ఇప్పుడు పార్టీలో రేవంత్ నిర్ణయాలకు ఎదురుచెప్పే సాహసం ఎవరూ చేయడం లేదు. విమర్శించిన వారే ఇప్పుడు ఆయన నాయకత్వాన్ని బలపరుస్తుండటం రేవంత్ సాధించిన అతిపెద్ద రాజకీయ విజయంగా చెప్పాలి. ఇటు ప్రత్యర్థులను కట్టడి చేయడంలోనూ అటు సొంత పార్టీలో అసమ్మతులను మూలనకూర్చోబెట్టడంలోనూ రేవంత్ రెడ్డి విజయం సాధిస్తూ తన పట్టును చాటి చెప్పారు. అంతే కాదు కాంగ్రెస్ లో పదేళ్ల పాటు తానే ముఖ్యమంత్రిని అని తనకు తాను ప్రకటించుకుని మరింత సంచలనంగా మారారు. మొత్తం మీద రేవంత్ రెడ్డికి వరస విజయాలు..ఆయన రాజకీయ బాటలో ముళ్లు లేకుండా క్లీన్ చేస్తున్నాయనే చెప్పాలి.