Revanth Reddy : రేవంత్ ను నమ్ముతారా? నిజాలను జనం అంగీకరిస్తారా?

ఎన్నికలకు ముందు రాజకీయ పార్టీలు అనేక రకాలైన హామీలు ఇస్తుంటాయి. నిజాయితీగా తాము చెప్పిన హామీలు అమలు చేయాలని భావించినప్పటికీ నిధుల సమస్య ఇబ్బంది పడుతుంది. అందులోనూ రేవంత్ సర్కార్ కు కేంద్ర ప్రభుత్వం నుంచి లభించే అదనపు సాయం అంతంత మాత్రమే. అందుకే ఇప్పటి వరకూ కొన్ని హామీలను అమలు చేయలేకపోయారు. అందుకే ఆయన ఈ మధ్య పెళ్లి అయిన మూడు రోజుల్లోనే పిల్లలు పుట్టలేదంటే ఎలా? తొమ్మిది నెలలు వేచి చూడాలి. అన్న కామెంట్స్ చేశారంటే తాను నిజాయితీగానే ఉన్నానని, ఇచ్చిన ప్రతి హామీని అమలు చేస్తానని చెప్పకనే చెప్పినట్లయింది.

విపక్షాల నుంచి అనేక విమర్శలు వస్తున్నప్పటికీ దానిని పెద్దగా పట్టించుకోకుండా తాను అనుకున్న సమయానికే ఇస్తున్నారు. ఆరు గ్యారెంటీల్లో ఇప్పటికే ఉచిత బస్సు ప్రయాణం, రూ. 500లకే గ్యాస్ సిలిండర్, 200 యూనిట్ల ఉచిత విద్యుత్ వంటి పథకాలను అమలు చేసి చూపించారు. రైతు భరోసాను కొంత ఆలస్యంగా అమలు చేశారన్న విమర్శలను ఎదుర్కొన్నారు. పింఛను, మహిళలకు నెలకు 1,500 రూపాయలు, కల్యాణమస్తు పథకాలను అమలు చేయాల్సి ఉంది. ప్రజలకు వాస్తవాలు చెప్పి తనను నమ్మాలని మరొకసారి ఎన్నికలకు వెళ్లాలన్న యోచనలోనే రేవంత్ రెడ్డి ఉన్నారు. మరి ప్రజలు దీనిని ఎలా తీసుకుంటారన్నది చూడాలి.