ఐపీఎల్ సీజన్ లో ఉత్కంఠ మ్యాచ్ లు ప్రారంభమయ్యాయి. కోల్ కత్తా నైట్ రైడర్స్ పై లక్నో సూపర్ జెయింట్స్ విజయం సాధించింది. చివరి బంతితో థ్రిల్లింగ్ విక్టరీ కొట్టేసింది.గురువారం జరిగిన ఐపీఎల్ మ్యాచ్లో కోల్ కతా నైట్ రైడర్స్ మరోసారి పేస్ బౌలింగ్ అనుభవలేమి మూలంగా మూల్యం చెల్లించింది. చివరి బంతి వరకు ఉత్కంఠ రేపిన ఈ పోరులో లక్నో మూడు వికెట్ల తేడాతో విజయం సాధించింది. రూకీ ముకుల్ చౌధరి చివర్లో చెలరేగగా, ఆయుష్ బడోని అర్ధశతకంతో బలమైన పునాది వేశాడు. 181 పరుగుల లక్ష్యాన్ని కాపాడే క్రమంలో కేకేఆర్ ఒక దశలో ఆధిపత్యం చెలాయించింది. ఈ సీజన్లో తొలిసారి బౌలింగ్ చేసిన ఆస్ట్రేలియా ఆల్రౌండర్ కెమెరాన్ గ్రీన్ రెండో బంతికే లఖ్నవూ కెప్టెన్ రిషబ్ పంత్ ను ఔట్ చేశాడు. అయితే వెన్ను శస్త్రచికిత్స తర్వాత పని భారాన్ని తగ్గిస్తూ వచ్చిన గ్రీన్ చివరి ఓవర్లలో అదే రిథమ్ చూపలేకపోయాడు.
ముకుల్ చౌధరి ధాటిగా...
చివరి రెండు ఓవర్లలో 30 పరుగులు అవసరమైన సమయంలో గ్రీన్ వేసిన ఓవర్లో 16 పరుగులు వచ్చాయి. 21 ఏళ్ల అరంగేట్ర ఆటగాడు ముకుల్ చౌధరి రెండు సిక్సర్లు, ఒక ఫోర్తో మ్యాచ్ను లఖ్నవూ వైపు తిప్పాడు. చివరి ఓవర్లో 14 అవసరమైన వేళ కేకేఆర్ ప్రధాన బౌలర్గా బాధ్యతలు తీసుకున్న వైభవ్ అరోరా ఒత్తిడిని తట్టుకోలేకపోయాడు. మిస్సైన యార్కర్ను చౌధరి డీప్ కవర్ మీద సిక్సర్గా మలిచాడు. చివరి బంతికి ఒక పరుగు అవసరమైన వేళ బ్యాటర్లు పరుగెత్తి విజయాన్ని ఖాయం చేశారు. చౌధరి 27 బంతుల్లో 54 నాటౌట్ గా నిలిచాడు. అతడు అవేశ్ ఖాన్ తో కలిసి కేవలం 24 బంతుల్లో 54 పరుగుల అజేయ భాగస్వామ్యం నెలకొల్పాడు. ఇంతకుముందు 16 ఓవర్లకు 128/7తో కష్టాల్లో ఉన్న లఖ్నవూకు ఈ జోడీ అద్భుత మలుపు తీసుకొచ్చింది. బడోని 34 బంతుల్లో 54 పరుగులతో ఇన్నింగ్స్ను నిలబెట్టాడు.
మధ్య ఓవర్లలో కేకేఆర్ ...
కేకేఆర్ బ్యాటింగ్లో కూడా మధ్య ఓవర్లలో ఆడలేకపోయింది. ఒక దశలో 98 పరుగులకు ఒక వికెట్ కోల్పోయిన కేకేఆర్ 200 పరుగుల మార్క్ను చేరలేకపోయింది. రోవ్మన్ పావెల్ 39 నాటౌట్ , గ్రీన్ 32 నాటౌట్ గా నిలిచి చివర్లో వేగం పెంచడంతో 181 పరుగులు చేయగలిగింది. ఇంతకు ముందు అంజిక్యా రహానే (41)ను స్పిన్నర్ డిగ్వేష్ రాథి ఔట్ చేయగా, మహ్మద్ షమీ చక్కటి క్యాచ్ అందుకున్నాడు. వెంటనే రఘువంశీ 45 పరుగుల వద్ద ఔటయ్యాడు. ఆ తర్వాత అవేశ్ ఖాన్ రింకు సింగ్ ను ఔట్ చేశాడు. 30 బంతుల పాటు బౌండరీ రాకపోవడంతో స్కోరు మందగించింది.
ఆరంభంలో తడబడినా...
లఖ్నవూ ఇన్నింగ్స్ ఆరంభంలోనే అరోరా వరుస బంతుల్లో ఐడెన్ మార్క్రమ్, మిచెల్ మార్ష్ ను ఔట్ చేశాడు. పంత్ ఔటవడంతో లఖ్నవూ కష్టాల్లో పడింది. 84/3 వద్ద ఇంకా మ్యాచ్ సమతౌల్యంలోనే ఉంది. తర్వాత కార్తిక్ త్యాగి నికోలస్ పూరన్ 13ను ఔట్ చేశాడు. సునీల్ నరైన్ కట్టుదిట్టంగా బౌలింగ్ చేయడంతో ఒత్తిడి పెరిగింది. అబ్దుల్ సమద్ (2), బడోని ఔటయ్యాక లఖ్నవూ 125 పరుగులకు ఆరు వికెట్లతో నిలిచింది. అక్కడి నుంచి చేజ్ ఆగిపోయినట్టే కనిపించినా, చౌధరి దూకుడుతో మ్యాచ్ తారుమారైంది. ఈ పరాజయంతో కేకేఆర్ నాలుగు మ్యాచ్ల తర్వాత కూడా విజయాన్ని అందుకో లేకపోయింది. ఒక మ్యాచ్ వర్షం కారణంగా రద్దవడంతో ఒక్క పాయింట్ మాత్రమే ఉంది. లఖ్నవూ వరుసగా రెండో విజయంతో నాలుగు పాయింట్లు సాధించి పట్టికలో ముందంజ వేసింది.