ముగిసిన తిరుమల బ్రహ్మోత్సవాలు

సామాన్య భక్తులకు అధిక ప్రాధాన్యత ఇచ్చి తిరుమల శ్రీవారి బ్రహ్మోత్సవాలను వైభవంగా నిర్వహించామని టీటీడీ ఛైర్మన్ వై.వి.సుబ్బారెడ్డి, ఈవో ధర్మా రెడ్డి తెలిపారు. 9 రోజుల పాటు జరిగిన బ్రహ్మోత్సవాల్లో దాదాపు ఏడున్నర లక్షల మంది భక్తులు శ్రీవారి మూలమూర్తిని దర్శించుకున్నారని చెప్పారు. టీటీడీలోని అన్ని విభాగాల అధికారులు, సిబ్బంది, జిల్లా యంత్రాంగం, పోలీసులు, శ్రీ‌వారి సేవ‌కుల‌ స‌మిష్టి కృషి, భక్తుల సహకారంతోనే శ్రీవారి సాల‌క‌ట్ల బ్రహ్మోత్సవాలు విజ‌య‌వంతం అయ్యాయ‌ని వైవి.సుబ్బారెడ్డి ఆనందం వ్యక్తం చేశారు. తిరుమ‌ల అన్న‌మ‌య్య భ‌వ‌నంలో బుధ‌వారం ఈవో శ్రీ ఎవి.ధ‌ర్మారెడ్డితో క‌లిసి ఛైర్మ‌న్ మీడియా స‌మావేశం నిర్వ‌హించారు. ఈ ఉత్సవాల్లో మొత్తం 24.89 లక్షల లడ్డూలు విక్రయించినట్టు చెప్పారు. అలాగే ఈ ఉత్సవాల సందర్భంగా హుండీ ఆదాయం 20.43 కోట్ల రూపాయలు వచ్చినట్టు వెల్లడించారు. ఎలాంటి అవాంఛనీయ సంఘటనలు జరగకుండా.. 2279 సిసిటివిలు, 4635 మంది టీటీడీ విజిలెన్స్‌, పోలీసులు బందోబ‌స్తు నిర్వ‌హించారు. చిన్నపిల్లలు తప్పిపోకుండా 1.20 లక్షల జియోట్యాగ్‌లు అందించామని టీటీడీ అధికారులు తెలిపారు.