Pithapuram : పిఠాపురంలో టీడీపీ vs జనసేన ఫైట్ కు ఫుల్ స్టాప్ పడేట్లు లేదే?

దీని వెనక ఎవరు ఉన్నారో తనకు తెలుసునని, కూటమిలో ఉన్నపార్టీనేతలను ఒకరినొకరు గౌరవించుకుంటే అందరికీ మంచిదని వర్మ వ్యాఖ్యానించారు కూడా. ముఖ్యమంత్రి చంద్రబాబుకే అవమానం జరిగినప్పుడు తాను ఈ సమావేశంలో ఎలా పాల్గొంటానంటూ అక్కడి నుంచి వెళ్లిపోయారు. పిఠాపురం మాజీ ఎమ్మెల్యే ఎన్వీఎస్ఎస్ఎన్ వర్మ గత కొంతకాలంగా అసంతృప్తితోనే ఉన్నారు. ఎన్నికలకు ముందు తనకు నాయకత్వం ఇచ్చిన మాట నిలబెట్టుకోలేదన్న అక్కసును వర్మ అవసరమైన ప్రతిసమయంలో వెళ్లగక్కుతూనే ఉన్నారు. వర్మకు పదవి దక్కకుండా ఎవరు అడ్డుపడుతున్నారో తనకు తెలుసునని వర్మ అనుచరులు బహిరంగంగానే సోషల్ మీడియాలో పోస్టులు పెడుతున్నారు.

ఉప ముఖ్యమంత్రి పవన్ కల్యాణ్ పిఠాపురం వచ్చినప్పుడు తనకు దక్కుతున్న గౌరవం ఆయన లేనప్పుడు మాత్రం దొరకడం లేదు. పిఠాపురం జనసేన నేతలకు, టీడీపీ నేతలకు మధ్య బాగా గ్యాప్ పెరిగింది. పదవి దక్కక పోవడం ఒకటి, తనను పట్టించుకోక పోవడం మరొకటి.. ఇక పిఠాపురంలో తాను పోటీ చేయలేమోననే ఆవేదన వర్మలో అడుగడుగునా కనిపిస్తుంది. అయితే అన్నీ అణిచిపెట్టుకుని సంయమనంతో వ్యవహరిస్తున్నారు. పార్టీ నాయకత్వం ఎప్పటికైనా తనను గుర్తించి అక్కును చేర్చుకుంటుందన్న ఆశతో వర్మ ఉన్నారు. అప్పటి వరకూ పిఠాపురంలో వర్మ వర్సెస్ జనసేన వార్ కు ఫుల్ స్టాప్ ఉండదట. సశేషమేనట.