అధికారం ఉందని విర్రవీగినా.. రెచ్చిపోయినా..ఫలితం ఇలాగే ఉంటుంది

తురకా కిషోర్ మాజీ మాచర్ల ఎమ్మెల్యే పిన్నెల్లి రామకృష్ణారెడ్డికి ముఖ్య అనుచరుడు. అయితే పిన్నెల్లికి ఓటమి లేదని భావించి తురకా కిషోర్ రెచ్చిపోయాడు. అందులోనూ వైసీపీ అధికారంలో ఉండటంతో తానే ఎమ్మెల్యేకు రైట్ హ్యాండ్ లాగా వ్యవహరించాడు. అంతటితో ఆగలేదు. నియోజకవర్గంలోని అనేక మంది టీడీపీ నేతలను పలు రకాలుగా ఇబ్బందులకు గురి చేశాడు. అప్పుడు హ్యాపీగానే ఉంది. అధికారం ఉన్నప్పుడు ఆల్ ఈజ్ వెల్. కానీ ప్రభుత్వం మారిన వెంటనే ఎమ్మెల్యేగా పిన్నెల్లి రామకృష్ణారెడ్డి ఓటమి పాలు కావడంతో పాటు పార్టీ కూడా అధికారం కోల్పోవడంతో తురకా కిషోర్ పై వరస కేసులు నమోదవుతున్నాయి. ఎక్కడెక్కడి వారో వచ్చి ఫిర్యాదు చేస్తున్నారు.

ఇప్పటికే తురకా కిషోర్ పై పదికి పైగా కేసులు నమోదయ్యాయి. పల్నాడు జిల్లాలోని మాచర్ల నియోజకవర్గంలోని పలు పోలీస్ స్టేషన్ లో నమోదయిన కేసుల్లో తురకా కిషోర్ నిందితుడిగా ఉన్నాడు. దీంతో గత కొద్ది నెలలుగా జైలు జీవితమే గడుపుతున్నాడు. తాజాగా తురకా కిశోర్ పై నమోదయిన అన్ని కేసుల్లో బెయిల్ లభించింది. అయితే పోలీసులు వదులుతారా? మరో కేసు రెడీ గా ఉంది. గుంటూరు జిల్లా జైలు నుండి విడుదలైన కిషోర్ ను రెంటచింతల పోలీసులు వెంటనే అదుపులోకి తీసుకున్నారు. ఇంకా ఎన్ని కేసులు పెడతారంటూ కుటుంబ సభ్యులు పోలీసులను అడ్డగించినా చట్టం తన పనితాను చేసుకుపోతుందంటూ తురకా కిషోర్ ను రెంటచింతల పోలీస్ స్టేషన్ కు తరలించారు. ఇంకా ఎన్ని కేసులు సిద్ధంగా ఉన్నాయో... చేసుకున్నోడికి.. చేసుకున్నంత.