దమ్ముంటే భయం లేకుండా ఆ విషయం చెప్పు పవన్: పేర్ని నాని

చంద్రబాబు వద్ద పవన్ కళ్యాణ్ కిరాయికి ఒప్పుకున్నాడని.. కూలీ తీసుకుంటున్నాడన్నారు పేర్ని నాని. కూలీకి తగ్గట్టుగా పనిచేయడమే పవన్ కు తెలుసు తప్ప వాస్తవాలు, విచక్షణతో అతనికి పని లేదన్నారు. ఈ ప్రభుత్వం మీద, ముఖ్యమంత్రి జగన్ మీద ఉద్ధేశపూర్వకంగా విషం చిమ్మడం, అసత్యాలు మాట్లాడటం తప్ప, ఆయన మాటల్లో వాస్తవాలేమున్నాయ్ అని ప్రశ్నించారు పేర్ని నాని. సీఎం జగన్ మీద పవన్ కు విపరీతమైన ద్వేషం, కక్ష ఉందన్నారు. ఇకనైనా, విషం చిమ్మే కార్యక్రమాలు కట్టిపెట్టాలని కోరారు పేర్ని నాని.

చంద్రబాబు కోసమే పనిచేస్తానని దమ్ముంటే ధైర్యంగా చెప్పాలి కదా పవన్ కళ్యాణ్ అని అన్నారు పేర్ని నాని. ఎన్నికల దాకా ముసుగు వేసుకుని.. అప్పుడు కలిసి పోటీ చేయడం.. ఎవరికి తెలియని విద్యలు ఇవన్నీ..? అని అన్నారు. మీ స్కీమ్ ఏంటంటే.. 30 చోట్ల చంద్రబాబు నియోజకవర్గాలకు ఇన్ ఛార్జీలను పెట్టడు. నీవేమో అక్కడ అభ్యర్థులను ప్రకటిస్తావు. ఆ నియోజకవర్గాలకు వెళ్ళి, ప్రభుత్వంపైన, మాపైన విషం చిమ్ముతావన్నారు. పవన్ కళ్యాణ్ 25-30 సీట్ల కంటే ఎక్కువ చోట్ల పోటీచేయడని అందరికీ తెలుసన్నారు. పార్లమెంటుకు ఒక సీటు పోటీ చేసి, నీవు ముఖ్యమంత్రివి అవుతావా అని ప్రశ్నించారు. పెందుర్తిలో మహిళ హత్య జరిగితే.. ఆ హత్య చేసిన వ్యక్తి, పూర్వం వాలంటీర్ గా పనిచేస్తే.. వాలంటీర్ వ్యవస్థకు హత్యకు ఏమిటి సంబంధం..? అలా అంటే, జనసేన, టీడీపీకి సంబంధించిన వాళ్ళు ఎన్ని హత్యలు, ఎన్ని గంజాయి కేసులు, ఎన్ని మానభంగం కేసుల్లో ముద్దాయిలుగా ఉన్నారు. వాటన్నింటికీ మీరే కారణమా.. ? అప్పుడెందుకు నువ్వు బాధ్యత తీసుకోలేదు..? అని ప్రశ్నించారు పేర్ని నాని. నిజాయితీ ఉంటే.. 2014 -19 మధ్య నువ్వు , చంద్రబాబు కలిసి చేసిన పాలనలో మీరు ఏం చేశారో.. మళ్ళీ అదే పరిపాలనను తెస్తాం అని చెప్పే దమ్ముందా..? మీకు దమ్ముంటే.. ఆ మాట చెప్పండి. ఆ మాట చెప్పి జనం దగ్గరకు వెళ్ళండని సవాల్ విసిరారు.