Chandrababu : ఆ పథకం ఇక మూలనపడినట్లేనా? ఆ ప్రస్తావనే లేదుగా?

అంతకు ముందు ఏ సభలోకి వెళ్లినా... ఏ సమావేశానికి వచ్చినా ముందుగా ప్రస్తావించేది పీ4 పథకం గురించే. పేద కుటుంబాలను దత్తత తీసుకోవాలని మార్గదర్శకులను సూచించారు. అలాగే ప్రభుత్వ అధికారులు కూడా పేద కుటుంబాల జాబితాతో పాటు ఆయా ప్రాంతాల్లో ఉన్న సంపన్న కుటుంబాలను మార్గదర్శకులుగా నిర్ణయించి జాబితాను రూపొందించింది. 2029 నాటికి ఆంధ్రప్రదేశ్ రాష్ట్రాన్ని పేదరిక రహితంగా మార్చడం, సంపన్నులను పేదల అభ్యున్నతిలో భాగస్వాములను చేయడం, పారదర్శకతతో కూడిన సామాజిక-ఆర్థిక అభివృద్ధిని సాధించడం పీ4 పథకం లక్ష్యం. దత్తత తీసుకున్న వారు ఆర్థిక సహాయం, నైపుణ్య శిక్షణ, విద్య మరియు ఇతర అవసరాలను అందించాల్సి ఉంటుంది. కార్పొరేట్ సంస్థలను కూడా ఇందులో భాగస్వామ్యుల్ని చేశారు.

తొలినాళ్లలో జిల్లాల పర్యటనలకు చంద్రబాబు వెళ్లినా కొన్ని పేద కుటుంబాలను పీ4 కింద చంద్రబాబు ఎంపిక చేసేవారు. కానీ కాలక్రమేణా ఆపథకం పట్ల సానుకూలత పెద్దగా రాకపోవడంతో చంద్రబాబు వెనక్కు తగ్గినట్లు కనిపిస్తుంది. అయితే ఈ పథకం ఆశించినంతగా సక్సెస్ కాకపోవడం వల్లనే చంద్రబాబు పీ4 పథకం గురించి ప్రస్తావన చేయడానికి కూడా పెద్దగా ఇష్టపడటం లేదని తెలిసింది. కొందరికి ఈ పథకం ద్వారా లబ్ది కలిగితే, ప్రయోజనం పొందని కుటుంబాలు రాజకీయంగా దూరమవుతాయని భావించి క్రమంగా పీ 4 పథకాన్ని క్రమేణా నీరుగార్చినట్లు కనపడుతుంది. ఇప్పుడు చంద్రబాబు నోటి నుంచి పీ4 పథకం ప్రస్తావన రాకపోవడానికి కూడా రాజకీయ కారణమేనని అంటున్నారు. మొత్తం మీద ఆర్భాటంగా ప్రకటించిన పీ4 పథకం అతి తక్కువ కాలంలోనే అటకెక్కిందన్న విమర్శలు వినిపిస్తున్నాయి.