Andhra Pradesh : ప్రధాని ఏపీలో అడుగు పెట్టకముందే తీపికబురు అందిందిగా
ప్రధాని నరేంద్ర మోదీ ఆంధ్రప్రదేశ్ లోకి అడుగు పెట్టకముందే కేంద్ర ప్రభుత్వం మరో తీపికబురు అందించింది
ప్రధాని నరేంద్ర మోదీ ఆంధ్రప్రదేశ్ లోకి అడుగు పెట్టకముందే కేంద్ర ప్రభుత్వం మరో తీపికబురు అందించింది. గ్రీన్ ఎనర్జీ కారిడార్ కు ఆమోదం తెలిపినట్లు సమచారం. ఈ ప్రాజెక్టు విలువ 21,800 కోట్ల రూపాయలు. నరేంద్ర మోదీ ఆంధ్రప్రదేశ్ పర్యటనకు ముందే కేంద్ర విద్యుత్తు నియంత్రణ మండలి గ్రీన్ ఎనర్జీ కారిడార్ ప్రాజెక్టుకు - 3 ఆమోదం తెలిపింది. దీనివల్ల రాయలసీమ, కోస్తాంధ్ర, ఉత్తరాంధ్ర ప్రాంతాలకు ప్రయోజనాలు చేకూరనుంది. భఆరీ విద్యుత్తు లైన్ వ్యవస్థను నెలకొల్పనుంది. అనంతపురం నుంచి నెల్లూరు జిల్లా రామాయపట్నం వరకు ఈ లైన్లు విస్తరించనున్నాయి
సీమ నుంచి సిక్కోలు వరకూ...
గ్రీన్ ఎనర్జీ కారిడార్–3 ప్రాజెక్టు ద్వారా రాయలసీమలో ఉత్పత్తి అయ్యే సోలార్, విండ్ వంటి పునరుత్పాదక విద్యుత్ను ఉత్తరాంధ్ర ప్రాంతాలకు తరలించే అవకాశముంటుంది. ఇది రాష్ట్రంలో విద్యుత్ పంపిణీ వ్యవస్థను బలోపేతం చేయనుంది. విద్యుత్తు సమస్యకు తెరపడే అవకాశాలు ఎక్కువగా ఉన్నాయి. తక్కువ ఖర్చుతో పర్యావరణ హితంగా ఈ ప్రాజెక్టును ఆంధ్రప్రదేశ్ లో నెలకొల్పనున్నారు. రాష్ట్ర ప్రభుత్వం ఈ ప్రాజెక్టును ‘గ్రీన్ ఎనర్జీ కారిడార్–3’ కింద కేంద్రానికి ప్రతిపాదించింది. మొత్తం రూ.28,033 కోట్ల అంచనాతో ప్రాజెక్టు సమర్పించగా, సీఈఆర్సీ పరిశీలించి రూ.21,800 కోట్లకే ఆమోదం తెలిపింది.
కేంద్రం వాటాగా...
ఇందులో కేంద్ర ప్రభుత్వం 30 శాతం గ్రాంట్ రూపంలో ఇవ్వనుంది. అంటే సుమారు రూ.6,540 కోట్లు ఈ ప్రాజెక్టు కింద కేంద్ర ప్రభుత్వం అందించనుంది. మిగిలిన వ్యయం అయిన పదిహేను వేల కోట్ల రూపాయలనును ఏపీ ట్రాన్స్కో భరించనుంది. ఈ పనులు 2026–27లో ప్రారంభమై రెండు సంవత్సరాల్లో పూర్తి చేయాలనే లక్ష్యంతో ప్రణాళిక సిద్ధమవుతోంది. ఈ ప్రాజెక్టు కింద సుమారు 350 కిలోమీటర్ల మేర కొత్త విద్యుత్ పంపిణీ లైన్లు ఏర్పాటు చేయనున్నారు. ప్రస్తుతం రాష్ట్రవ్యాప్తంగా 72,000 మెగావాట్ల సోలార్, విండ్, పంప్డ్ స్టోరేజ్ ప్రాజెక్టులు వివిధ దశల్లో ఉన్నాయి.
రాయలసీమలో...
గ్రీన్ ఎనర్జీ ప్రాజెక్టుల్లో అధిక భాగం రాయలసీమ ప్రాంతంలోనే ఉండటంతో, అక్కడ ఉత్పత్తి అయ్యే విద్యుత్ను ఉత్తరాంధ్రకు తరలించడం ప్రధాన లక్ష్యంగా ఉంది. పవర్ గ్రిడ్ కార్పొరేషన్ లైన్లను ఉపయోగిస్తే అధిక ఛార్జీలు చెల్లించాల్సి వస్తుందని, ట్రాన్స్కో స్వంత నెట్వర్క్ను అభివృద్ధి చేయాలని నిర్ణయించింది. ఇప్పటికే ‘గ్రీన్ ఎనర్జీ కారిడార్–1’ కింద అనంతపురం జిల్లాలో ట్రాన్స్కో నెట్వర్క్ అభివృద్ధి చేసింది. ఇప్పుడు ఆ నెట్వర్క్ను మరింత విస్తరించి, జీఈసీ–3 కింద కొత్త లైన్లు ఏర్పాటు చేయబోతున్నారు. ఇది పునరుత్పాదక ఇంధన వినియోగాన్ని పెంచడమే కాకుండా, విద్యుత్ సరఫరా ఖర్చులను తగ్గించడంలోనూ సహాయపడుతుంది.
ఉత్తరాంధ్ర ప్రాంతానికి...
రాష్ట్రంలోని కొత్త పరిశ్రమలు, ముఖ్యంగా రాయలసీమలో ఏర్పడే ఫ్యాక్టరీలు మరియు పరిశ్రమలు ఈ ప్రాజెక్టు ద్వారా పెద్ద స్థాయిలో లబ్ధి పొందుతాయని అధికారులు తెలిపారు. రామాయపట్నం నుంచి కాకినాడ, విశాఖపట్నం వరకు ఈ నెట్వర్క్ విస్తరణ కొనసాగుతుంది. దీని ద్వారా ఉత్తరాంధ్ర ప్రాంతాలకు విద్యుత్ సరఫరా మరింత సులభతరం అవుతుంది. విశాఖలోని గూగుల్ డేటా సెంటర్, కర్నూలు జిల్లా రిలయన్స్ ఫుడ్ పార్క్, తిరుపతిలోని ఎలక్ట్రానిక్ కంపెనీలు ఈ కొత్త లైన్ ద్వారా విద్యుత్ పొందనున్నాయి. రాష్ట్ర ప్రభుత్వం ఈ ప్రాజెక్టు ద్వారా భవిష్యత్లో పరిశ్రమల అవసరాలను తీర్చడంతో పాటు, విద్యుత్ పంపిణీ వ్యవస్థను ఆధునికంగా మార్చే దిశగా మరో కీలక అడుగు పడినట్లయింది.