Ys Jagan : మార్గాని భరత్ విషయంలో జగన్ ఆలోచన మార్చుకున్నారా?

గతంలో పార్లమెంటు ఎన్నికల్లో పోటీ చేసి గెలిచిన వారికి మరొకసారి అవకాశం ఇవ్వాలని నిర్ణయించారు. 2019 ఎన్నికల్లో ఎప్పుడూ లేనివిధంగా మొదటిసారి రాజమండ్రి పార్లమెంటు స్థానానికి బీసీ అభ్యర్థిని ప్రకటించారు. మార్గాని భరత్ ను పోటీ చేయించారు. ఆయన గెలిచారు. దీనివల్ల తూర్పు గోదావరి జిల్లాలో అనేక అసెంబ్లీ నియోజకవర్గాల్లో ఈ ప్రభావం పడింది. అయితే 2024 ఎన్నికలకు వచ్చేసరికి మార్గాని భరత్ ను రాజమండ్రి నగర నియోజకవర్గం నుంచి పోటీ చేయించారు. అయితే ఈసారి ఆ ఆలోచన మార్చుకున్నట్లు తెలిసింది.

తిరిగి మార్గాని భరత్ ను రాజమండ్రి పార్లమెంటుకు పోటీ చేయించాలన్న నిర్ణయానికి జగన్ వచ్చినట్లు తెలిసింది. భరత్ కూడా రాష్ట్ర రాజకీయాలకంటే దేశ రాజకీయాలకే ఎక్కువ ఆసక్తి చూపుతున్నట్లు కనపడుతుంది. ఎన్నికల్లో ఓటమి పాలయిన నాటి నుంచి మార్గాని భరత్ యాక్టివ్ గానే ఉంటున్నారు. పార్టీ కార్యక్రమాల్లోనే కాకుండా అధికార పార్టీపై విమర్శలు చేయడంలో మార్గాని భరత్ ముందుంటున్నారు. అయితే మార్గాని భరత్ ను మళ్లీ రాజమండ్రి పట్టణ నియోజకవర్గానికే పోటీ చేయించాలని ఆయన అనుచరులు కోరుతున్నట్లు తెలిసింది. ఈ మేరకు ఇటీవల కొందరు సమావేశమై జగన్ ను కలసి తమ మనసులో మాటను చెప్పాలని నిర్ణయించుకున్నట్లు సమాచారం. మరి చివరకు జగన్ ఎలాంటి నిర్ణయం తీసుకుంటారన్నది చూడాలి.