Ditva Cyclone : దిత్వాతో వానలు దంచేస్తాయట.. ముంపు ఇక్కడేనట

ఇక ఆంధ్రప్రదేశ్ లో దిత్వా తుపాను ప్రభావం ఎక్కువగా ఉంటుందని విశాఖ వాతావరణ శాఖ తెలిపింది. దిత్వా ప్రభావంతో ఆంధ్రప్రదేశ్, తెలంగాణ రాష్ట్రాల్లో మూడు రోజుల పాటు వర్షాలు కురిసే అవకాశముందని తెలిపింది. ఆంధ్రప్రదేశ్ లో ఇప్పటికే నెల్లూరు, చిత్తూరు, తిరుపతి జిల్లాలకు వాతావరణ శాఖ రెడ్ అలెర్ట్ జారీ చేసింది. దిత్వా తుపాను తీరం వెంట కదులుతూ బలహీన పడుతుందని, తీరం దాటదని అధికారుల తెలిపారు. అయినా కొన్ని చోట్ల భారీ నుంచి అతి భారీ వర్షాలు పడే అవకాశముందని వాతావరణ శాఖ హెచ్చరికలు జారీ చేసింది. రాయలసీమ జిల్లాల్లోనూ మోస్తరు నుంచి భారీ వర్షాలు పడే అవకాశముందని, మత్స్యకారులు చేపల వేటకు వెళ్లవద్దని హెచ్చరికలు జారీ చేసింది.

దిత్వా తుపాను వాయుగుండంగా మారినా ఆ ప్రభావంతో తెలంగాణలో వానలు పడతాయని హైదరాబాద్ వాతావరణ శాఖ వెల్లడించింది. ప్రధానంగా దక్షిణ కోస్తాలో భారీ వర్షాలు కురుస్తాయని తెలిపింది. మిగిలిన జిల్లాల్లో మోస్తరు వానలు పడతాయని తెలిపింది. గంటకు ముప్ఫయి నుంచి నలభై కిలోమీటర్ల వేగంతో ఈదురుగాలులు వీస్తాయని వాతావరణ శాఖ హెచ్చరించింది. రెండు రోజుల పాటు తెలంగాణలో మోస్తరు నుంచి తేలికపాటి వానలు పడే అవకాశముందని హైదరాబాద్ వాతావరణ శాఖ వెల్లడించింది. అయితే దిత్వా తుపాను కారణంగా చలి తీవ్రత మళ్లీ పెరిగింది. సింగిల్ డిజిట్ ఉష్ణోగ్రతలు నమోదవుతున్నాయి. ఏజెన్సీ ప్రాంతాలతో పాటు హైదరాబాద్ నగరంలోనూ చలి ఎక్కువగా ఉంది.