BJP : మాధవుడికి పెను సవాళ్లు.. సీమలో నేతలు సహకరిస్తారా?

రాయలసీమలో పార్టీ బలోపేతం దిశగా మాధవ్ పర్యటన కొనసాగుతుందని అంటున్నారు. అయితే మాధవ్ బీజేపీ అధ్యక్షుడిగా బాధ్యతలను స్వీకరించిన తర్వాత అనేక సవాళ్లను ఎదుర్కొనాల్సి ఉంటుందన్న విశ్లేషణలు వెలువడుతున్నాయి. రాయలసీమలో పార్టీకి పెద్దగా పట్టు లేకపోయినా ఇతర పార్టీల నుంచి వచ్చిన నేతలు ఎక్కువగా ఉన్నారు. ఆదినారాయణరెడ్డి, టీజీ వెంకటేశ్ తో పాటు అనేక మంది నేతలు ఇతర పార్టీల నుంచి వచ్చిన నేతలున్నారు. రాయలసీమలో పార్టీని బలోపేతం చేయడంపై ఆయన దృష్టి పెట్టారని చెబుతున్నారు. అక్కడ ఆరోపణలు ఎక్కువగా ఉన్నాయి. ముఖ్యంగా జమ్మలమడుగు ఆదినారాయణరెడ్డికి, తాడపత్రి మున్సిపల్ ఛైర్మన్ జేసీ ప్రభాకర్ రెడ్డికి మధ్య ఫ్లై యాష్ వివాదం కూడా తలెత్తింది.

దీంతో పాటు ఆదోని వంటి నియోజకవర్గాల్లో అక్కడ బీజేపీ ఎమ్మెల్యే పార్థసారధికి, స్థానిక టీడీపీ నేత, మాజీ ఎమ్మెల్యే మీనాక్షినాయుడుకు మధ్య పొసగడం లేదు. జనసేన, బీజేపీ నేతలకు కూడా అనేక నియోజకవర్గాల్లో పడటం లేదు. చిత్తూరు జిల్లాలో కూడా ఇదే పరిస్థితి. అనంతపురం జిల్లాలోనూ హిందూపురం వంటి నియోజకవర్గాల్లోనే కూటమి నేతల మధ్య సఖ్యత లేదు. ఇలా రాయలసీమలో కూటమి నేతల మధ్య ఆధిపత్య పోరు నడుస్తుంది. అదే సమయంలో తమను అధికారంలో ఉన్న టీడీపీ లెక్క చేయడం లేదని బీజేపీ నేతల నుంచి ఆరోపణలు వినిపిస్తున్న నేపథ్యంలో మాధవ్ రాయలసీమ పర్యటన ఏ మేరకు సాగుతుందన్నది చూడాల్సి ఉంది. అయితే మాధవ్ సౌమ్యుడిగా పేరుంది. తొలి నుంచి పార్టీలో ఉన్న నేతలకు, మధ్యలో వచ్చిన నాయకుల మధ్య ఉన్న గ్యాప్ ను మాధవ్ సున్నితంగా ఎలా చెరిపేస్తారన్నది చూడాల్సి ఉంది.