Breaking : రాజ్యసభలో అమరావతి బిల్లు ఆమోదం

తెలుగుదేశం పార్టీ తరుపున కేంద్ర మంత్రి రామ్మోహన్ నాయుడు ప్రసంగించారు. అమరావతిని 2015లో చంద్రబాబు ప్రభుత్వం ప్రకటించిన వెంటనే రైతులు స్వచ్ఛందంగా ముందుకు వచ్చి రూపాయి తీసుకోకుండా భూములు రాజధాని కోసం ఇచ్చామని తెలిపారు.అయితే తర్వాత వచ్చిన ప్రభుత్వం మూడు రాజధానులంటూ మూడు ముక్కలను చేసేందుకు ప్రయత్నించిందన్నారు. దీనివల్ల ఆంధ్రప్రదేశ్ కు అమరావతికి రాజధాని లేకుండా పోయిందని చెప్పారు. రాజధాని అమరావతి రైతులు 1600 పోరాటం చేశారన్నారు.మహిళలని చూడకుండా రైతులపై కేసులు నమోదు చేశారని రామ్మోహన్ నాయుడు తెలిపారు. అమరావతి రాజధాని అని 2024లో తీర్పు నిచ్చారని తెలిపారు. బీజేపీ రాజ్యసభ సభ్యుడు లక్ష్మణ్ మాట్లాడుతూ రైతులు పైసా తీసుకోకుండా తమ భూములిచ్చారన్నారు. వికసిత్ ఆంధ్ర కోసం అమరావతి రాజధాని అవసరమని అన్నారు. బీజేపీ రాజ్యసభ సభ్యుడు ఆర్. కృష్ణయ్య మాట్లాడుతూ రాష్ట్రానికి మధ్యలో ఉన్నందున అమరావతిని రాజధాని చేయడం సముచితమని అన్నారు.

వైసీపీ రాజ్యసభ సభ్యుడు వైవీ సుబ్బారెడ్డి మాట్లాడుతూ ఆంధ్రప్రదేశ్ రాజధాని అమరావతిలో పెద్దయెత్తున అవినీతి జరుగుతుందని అన్నారు. ఈ బిల్లు రూపొందించడంలోనే కొన్ని లోపాలున్నాయని తెలిపారు. హైదరాబాద్, బెంగళూరు, ఢిల్లీలో చదరపు అడుగు నాలుగు వేలు అయితే అమరావతిలో పన్నెండు వేల రూపాయలు అవుతుందని అన్నారు. ఈ బిల్లులో క్లారిటీ లేదన్నారు. అమరావతిని తమ పార్టీ ఎన్నడూ వ్యతిరేకించలేదని, ఇప్పటి వరకూ అమరావతిని అభివృద్ధి చేయలేదని అన్నారు. ఈ బిల్లును వ్యతిరేకిస్తూ తాము సభ నుంచి వాకౌట్ చేస్తున్నట్లు ప్రకటించారు.