తొక్కితే కాని.. తాడేపల్లి గుర్తుకు రాలేదా?

కానీ 151 సీట్లతో జగన్ అతి పెద్ద విజయం సాధించారు. ఆంధ్రప్రదేశ్ మొత్తం జగన్ కు అండగా నిలిచిందని ఫలితాలను బట్టి తెలిసింది. అయినా జగన్ ముఖ్యమంత్రి అయిన తర్వాత అభినందించాలని ఏ ఒక్కరికీ నోరు రాలేదు. కలవడానికి కూడా వారు ఇష్టపడలేదు. మనసు రాలేదు. నాగార్జున వంటి సన్నిహితులు తప్పించి ఎవరూ జగన్ ను అభినందించిన పాపాన పోలేదు. ఇది వైసీపీలో ఇప్పటికీ చర్చనీయాంశంగానే ఉంది. చిన్నా చితకా నటులు తప్ప టాలీవుడ్ నుంచి మద్దతు లభించకపోయినా జగన్ ముఖ్యమంత్రి అయ్యారు.

అయితే ఇప్పుడు పోలోమంటూ తాడేపల్లి క్యాంప్ కార్యాలయానికి టాలీవుడ్ ప్రముఖులు పరుగులు తీశారు. ఇందులో చిరంజీవికి మినహాయింపు ఉంది. చిరంజీవి ఇప్పటికి రెండుసార్లు జగన్ ను కలిసి వెళ్లారు. సైరా సినిమా విడుదలయిన సందర్భంలో ఒకసారి, టాలీవుడ్ సమస్యలను చర్చించడానికి మరోసారి చిరంజీవి వచ్చి కలసి వెళ్లారు. కానీ ఇతర టాలీవుడ్ హీరోలు, నిర్మాతలు, దర్శకులకు మాత్రం జగన్ ను కలిసే తీరిక లేకుండా పోయింది.

ఏపీలో సినిమా టిక్కెట్లను పెంచడాన్ని టాలీవుడ్ తట్టుకోలేకపోయింది. జగన్ పట్టుదల, మొండితనం తెలిసిన టాలీవుడ్ ఎట్టకేలకు దిగివచ్చింది. మహేష్ బాబు, కొరటాల శివ, రాజమౌళి వంటి వారు ఇప్పుడు జగన్ వద్దకు చర్చలకు వస్తున్నారు. ఇప్పటికీ కొందరు ప్రముఖులు ఈ భేటీకి దూరంగా ఉండటం విశేషం. టాలీవుడ్ లో ప్రముఖ నిర్మాతలుగా కొనసాగుతున్న కొందరు జగన్ ను కలిసేందుకు ఇప్పటికీ ఇష్పపడటం లేదు. మొత్తం మీద టాలీవుడ్ లో కదలిక వచ్చింది. తమ కిందకు నీరు చేరితే కాని జగన్ గుర్తుకు రాలేదన్న కామెంట్స్ వినపడుతున్నాయి.