Kalvakuntla Kavitha : కల్వకుంట్ల కవిత సస్పెన్షన్ నుంచి.. బహిష్కరణ తప్పదా?

సాధారణంగా రాజకీయాల్లో ఎప్పుడు ఏం జరుగుతుందో చెప్పలేం. అందులోనూ ప్రాంతీయ పార్టీల్లో కుటుంబ రాజకీయాలు ఎక్కువగా ఉంటాయి. కుటుంబ సభ్యుల పెత్తనమే ఎక్కువగా ఉంటుంది. బీఆర్ఎస్ లో కేసీఆర్ కుమారుడు కేటీఆర్, కుమార్తె కవితలు కేసీఆర్ తర్వాత స్థానాల్లో సహజంగా ఉంటారు. కవితపై సస్పెన్షన్ వేటు వేసినా భవిష్యత్ లో ఎన్నికలకు ముందు అయినా ఆమెపై విధించిన సస్పెన్షన్ ఎత్తివేసే అవకాశాలున్నాయి. అదే అందరూ అంచనా వేశారు. గతంలో మాజీ మంత్రి జగదీశ్వర్ రెడ్డి పై విమర్శలు చేసిన సమయంలోనూ ఆయన కవితపై విమర్శలు చేయడంలో కొంత జాగ్రత్తలు పాటించారు. ఆమెపై దూషణ భూషణలకు దిగలేదు. కవిత తనపై విమర్శలు చేసిన వాటికి మాత్రమే సమాధానాలిచ్చారు.

కానీ ఇప్పుడు మాజీ మంత్రి నిరంజన్ రెడ్డి మాత్రం కల్వకుంట్ల కవిత పై చేసిన విమర్శలు చూస్తుంటే ఖచ్చితంగా పార్టీ నాయకత్వం నుంచి వచ్చిన ఆదేశాల మేరకు ఆయన వ్యాఖ్యానించినట్లు తెలిసింది. ఎందుకంటే నిరంజన్ రెడ్డి ఏకంగా కల్వకుంట్ల కవితను లిక్కర్ రాణి అని సంబోధించారంటే కవితకు ఇక బీఆర్ఎస్ లోకి నో ఎంట్రీ అని చెప్పవచ్చన్నది పార్టీ కింది స్థాయి కార్యకర్తల నుంచి వినిపిస్తున్న మాట. పార్టీ అధినేత కుమార్తెను అంత ధైర్యంగా లిక్కర్ రాణి అని అన్నారంటే ఖచ్చితంగా తెలంగాణ భవన్ నుంచి లేదా ఎర్రవెల్లి ఫాం హౌస్ నుంచి వచ్చిన ఆదేశాలనే నమ్మాలి. అందుకే బీఆర్ఎస్ లోకి ఇక కల్వకుంట్ల కవిత ఎంట్రీ అనేది చాలా కష్టమన్న అభిప్రాయం పార్టీ కార్యకర్తల్లో వ్యక్తమవుతుంది. పార్టీ నుంచి ఆమెను బహిష్కరిస్తున్నట్లు త్వరలోనే ఒక ప్రకటన వెలువడే అవకాశాన్ని కొట్టిపారేయలేమన్నది ముఖ్య నేతల అభిప్రాయంగా తెలుస్తుంది.