Kalvakuntla Kavitha : బీఆర్ఎస్ లో ఆధిపత్య పోరుకు ఇది నిదర్శనమా? కవిత ప్రశ్నల్లో తప్పేముంది?

నిన్నటి వరకూ హరీశ్ రావు వేరుకుంపటి పెట్టుకుంటారన్న వార్తలు కొంత సంచలనం కలిగించాయి. అయితే హరీశ్ రావుతో కేటీఆర్ ఆయన ఇంటికి వెళ్లి మరీ కలసి వచ్చారు. ఇక హరీశ్ రావు ఎర్రవెల్లి ఫామ్ హౌస్ కు వెళ్లి రెండు రోజులుగా కేసీఆర్ తో సమావేశమవుతున్నారు. కాళేశ్వరం ప్రాజెక్టు విషయంలో ఇచ్చిన నోటీసులపై చర్చిందేకేనని బయటకు చెబుతున్నప్పటికీ హరీశ్ రావును కేసీఆర్ బుజ్జగించడానికే పిలిచారన్న టాక్ వినపడుతుంది. కేసీఆర్ తో సమావేశం తర్వాతనే హరీశ్ రావు కేటీఆర్ కు పార్టీ పగ్గాలతో పాటు అధికారంలోకి వస్తే ముఖ్యమంత్రి పదవి ఇచ్చినా తనకు అభ్యంతరం లేదని హరీశ్ రావు చెప్పారు. హరీశ్ రావు తాను సాధారణ కార్యకర్తగా పార్టీలో పనిచేస్తానని చెప్పారు.

కేటీఆర్ ఉన్నత చదువులు చదువుకుని ఉద్యమంలో పాల్గొంటూ రాజకీయాల్లోకి వచ్చారు. తండ్రికి చేదోడు వాదోడుగా ఉంటున్నారు. అందుకే ఆయనకు ముందుగానే కేసీఆర్ బీఆర్ఎస్ వర్కింగ్ ప్రెసిడెంట్ పదవిని అప్పగించారు. కొన్నేళ్ల నుంచి పార్టీని కేటీఆర్ నడిపిస్తున్నాడు. ఏడాది నుంచి కేసీఆర్ ఫామ్ హౌస్ కే పరిమితమయితే కేటీఆర్ అంతా తానే అయి చూసుకుంటున్నారు. క్యాడర్ కూడా తమ భవిష్యత్ నేత కేటీఆర్ అని మానసికంగా ఫిక్స్ అయ్యారు. నేతలు కూడా కేటీఆర్ చుట్టూ ప్రదిక్షిణలు చేస్తున్నారంటే ఎర్రవెల్లి ఫామ్ హౌస్ నుంచి అదే రకమైన సిగ్నల్స్ వచ్చాయని అనుకోవాలి. అందుకే కేటీఆర్ కు పార్టీ పగ్గాలను పూర్తిగా అప్పగిస్తానని కేసీఆర్ చెప్పినా ఎవరూ అభ్యంతరం చెప్పరు కూడా.

కానీ కల్వకుంట్ల కవిత విషయంలోనే కొంత తేడా కనపడుతుంది. ఆమెపై ఢిల్లీ లిక్కర్ స్కామ్ కేసు ఉంది. ఆరు నెలల పాటు జైల్లో ఉండి వచ్చారు. అందులో నిజానిజాలు ఎలా ఉన్నప్పటికీ కవిత అందులో దోషిగానే జనం చూస్తున్నారు. ఈ సమయంలో కవితకు ప్రాధాన్యం ఇస్తే బాగుండదని కేసీఆర్ భావించి ఉండవచ్చు. అదే సమయంలో కేంద్రంలో అధికారంలో ఉన్న బీజేపీతో కయ్యానికి దిగే కంటే కాంగ్రెస్ ను ముందు రాష్ట్రంలో అణిచివేయాలన్న ప్లాన్ తోనే కేసీఆర్ బీజేపీపై ఫైర్ కాకపోయి ఉండవచ్చన్న భావన కలుగుతుంది. కవిత తనను జైల్లో పెట్టిన పార్టీని ఒక్క మాట మాట్లాడకుండా ప్రసంగాన్ని ముగించడంపైనే అభ్యంతరం తెలిపారు. తాను కూడా ఉద్యమ సమయంలో కీలక పాత్ర పోషించానని, జాగృతి పేరుతో మహిళలను ఏకం చేశానని, అలాంటి తనను పక్కన పెట్టడంపై ఆమె కొంత ఇబ్బంది పడుతున్నారు. అయితే ఫ్యామిలీ పాలిటిక్స్ కావడంతో ఇది టీ కప్పులో తుపానులా తొలిగిపోతుందని నేతలు చెబుతున్నారు.