చికోటి ప్రవీణ్ మీద ఇంత అభిమానమా?

చికోటి ప్రవీణ్.. తెలుగు రాష్ట్రాల్లోనే కాదు దేశ వ్యాప్తంగా మారుమ్రోగిపోయిన పేరు. అతడిపై ఎన్నో విమర్శలు, ఆరోపణలు కూడా ఉన్నాయి. బాలీవుడ్‌, టాలీవుడ్‌ సినీప్రముఖులతోనూ, పార్టీలతో సంబంధం లేకుండా రాజకీయ నాయకులతోనూ సంబంధాలు కలిగి ఉన్న వ్యక్తి. తెలుగు రాష్ట్రాల్లోని కొందరు మంత్రులు, మాజీ మంత్రులు, ఎమ్మెల్యేలు, జెడ్పీ చైర్మన్లు ఇలా ఎంతో మంది చికోటి ప్రవీణ్ కు బాగా పరిచయం. ఒకప్పుడు హైదరాబాద్‌, సైదాబాద్‌లో సిరామిక్‌ టైల్స్‌ వ్యాపారం చేసిన చికోటి ప్రవీణ్.. ఆ తర్వాత సినిమాలంటే ఆసక్తి ఉండడంతో.. నిర్మాతగా మారి సినిమాలు కూడా తీశాడు. ఏకంగా నటుడిగా కూడా అవతారం ఎత్తాడు. కలిసి రాకపోవడంతో క్రైమ్ ను మార్గంగా ఎంచుకున్నాడు. గోవాలో ఓ పేకాట క్లబ్‌లో కొన్ని టేబుళ్లను అద్దెకు తీసుకుని పేకాట నిర్వహిస్తూ వచ్చాడు. క్యాసినో కింగ్ గా మారి కోట్లకు పడగలెత్తాడు. జంట నగరాల్లో సెలబ్రిటీల కోసమే క్యాసినో నిర్వహించాడని చెబుతారు. 2014 తర్వాత తన చీకటి వ్యాపారాన్ని ఇతర రాష్ట్రాలకు, దేశాలకు విస్తరించేశాడని కూడా అంటారు. ప్రత్యేక విమానాల్లో ఇండోనేషియా, నేపాల్‌కు కస్టమర్లను తీసుకెళ్లి కోట్ల రూపాయలతో పేకాట ఆడించిన ట్రాక్ రికార్డ్ ఉన్న వ్యక్తి.