Tiruamla : సెలవుల రోజు తిరుమలకు వెళ్లే వారికి అలెర్ట్

తిరుమలకు ఇటీవల కాలంలో భక్తుల ఎక్కువ సంఖ్యలో రావడం సాధారణంగా మారింది. వసతి గృహాలు దొరకడం కూడా కష్టంగా మారింది. ముందుగా టిక్కెట్లు బుక్ చేసుకున్న వారితో పాటు అప్పటికప్పుడు తిరుమలకు వచ్చే భక్తుల సంఖ్య కూడా ఇటీవల కాలంలో పెరిగింది. రవాణా సౌకర్యాలు మెరుగుపడటంతో పాటు సంక్రాంతి సెలవులు కూడా పూర్తి కావడంతో భక్తుల తిరుమల శ్రీనివాసుడి వద్ద మొక్కులు చెల్లించుకునేందుకు భారీగా తరలి వస్తున్నారు. భక్తులు అత్యధిక సంఖ్యలో తరలి రావడంతో తిరుమల తిరుపతి దేవస్థానం అధికారులు అన్ని ఏర్పాట్లు చేస్తున్నారు.

ఈరోజు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్ మెంట్లు నిండిపోయాయి. బయల గోగర్భం డ్యాం వరకూ భక్తుల క్యూ లైన్ విస్తరించింది. అంటే అక్టోపస్ బిల్డింగ్ వరకూ భక్తుల క్యూ లైన్ ఉంది. సర్వదర్శనం క్యూ లైన్ లోకి ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం ఇరవై గంటల సమయం పడుతుందని తిరుమల తిరుపతి దేవస్థానం అధికారులు వెల్లడించారు. టైమ్ స్లాట్ దర్శనం భక్తులు ఆరు గంటలు, మూడు వందల ప్రత్యేక దర్శనం టిక్కెట్లను కొనుగోలు చేసిన భక్తులకు శ్రీవారి దర్శనం నాలుగు గంటలకుపైగానే సమయం పడుతుంది. నిన్న తిరుమల శ్రీవారిని 84,014 మంది భక్తులు దర్శించుకున్నారు. వీరిలో 35,131 మంది తమ తలనీలాలను సమర్పించారు. నిన్న తిరుమల శ్రీవారి హుండీ ఆదాయం 3.69 కోట్ల రూపాయలు వచ్చిందని అధికారులు వెల్లడించారు.