నాటు తుపాకీతో స్పాట్ పెట్టాడు.. పేలకపోవడంతో..!

మానకొండూర్ మండల కేంద్రంలో జరిగిన తుపాకీ పేలుడు సంఘటనలో ప్రధాన నిందితుడిని పోలీసులు అరెస్టు చేసినట్లు కరీంనగర్ పోలీస్ కమీషనర్ ఎల్ సుబ్బారాయుడు తెలిపారు. గోదావరిఖనిలోని జీఎం కాలనీకి చెందిన వీణవంక సాయితేజ (27) చెల్లెలు ఆత్మహత్య చేసుకుని మరణించడానికి మానకొండూర్‌కు చెందిన భాషబోయిన అరుణ్ (35) ప్రధాన కారణమని మనసులో కక్ష పెంచుకున్నాడు. తన స్నేహితులైన మంచిర్యాల జిల్లా మందమర్రికి చెందిన కందుల ప్రదీప్ (25) అలియాస్ చంది అలియాస్ ఆర్య, భువనగిరి జిల్లా యాదగిరిగుట్ట ప్రాంతానికి చెందిన పాల మల్లేశంలతో కలిసి గత ఏప్రిల్ 19న హైదరాబాద్ నుండి ద్విచక్ర వాహనంపై మానకొండూర్‌కు వచ్చాడు. అదే రోజు రాత్రి 10 గంటల ప్రాంతంలో అరుణ్ పై తుపాకీతో కాల్పులకు తెగబడ్డాడు. ఢిల్లీలో అక్రమంగా కొనుగోలు చేసిన నాటు తుపాకీని అందుకు వాడాడు. ఈ దాడిలో నాటు తుపాకీ పేలక పోవడంతో అరుణ్ ప్రాణాలతో బయటపడ్డాడు.