ఇంట్లోనే దొంగనోట్ల ముద్రణ.. రూ.2వేలు అప్పు ఇచ్చి పట్టుబడిన ముఠా
దొంగ నోట్లను ముద్రించి వాటిని మార్కెట్ లోకి పంపుతున్న ఒక ముఠాను పోలీసులు అరెస్ట్ చేశారు.
వందకు నాలుగు వందలు.. లక్షకు నాలుగు లక్షలు. ఏంటి నమ్మడం లేదా ? ఇప్పుడు బెజవాడలో ఇదే దందా సాగుతోంది. వడ్డీ వ్యాపారం అనుకునేరు. అస్సలు కాదు. తీసుకున్న డబ్బు తిరిగి ఇవ్వనక్కర్లేదు కూడా.. మీరు ఒరిజినల్ నోట్ల కట్టలు ఇస్తే.. వాళ్లు నకిలీ నోట్లు నాగింతలు ఇస్తారు అంతే. ఇలా ఈజీ మనీకి అలవాటుపడిన కేటుగాళ్లు ఎట్టకేలకు పోలీసులకు చిక్కారు. కృష్ణా జిల్లా పెడనలో ఈ గ్యాంగ్ ను అరెస్ట్ చేసినట్లు మచిలీపట్నం డీఎస్పీ షేక్ మసూంబాషా తెలిపారు. పోలీసులు తెలిపిన వివరాల ప్రకారం.. కాసా వెంకటేశ్వరరావు అనే వ్యక్తి.. ఆర్థిక వ్యవస్థను దెబ్బతీసేలా దుకాణం తెరిచాడు. అయితే వీరికి దొంగనోట్ల ముద్రణ ఎలా తెలుసు ? అని అనుమానం రావొచ్చు. అరచేతిలో స్మార్ట్ ఫోన్ ఉందిగా.. ఏం కావాలన్నా.. ఏం నేర్చుకోవాలన్నా అది ఒక్కటి చాలు. యూట్యూబ్ లో దొంగనోట్లను ఎలా ముద్రించాలో చూశారు. మూడు నెలలపాటు క్షుణ్ణంగా అధ్యయనం చేసిన తర్వాత.. వీరభద్రపురంలోని కాసా నాగరాజు అనే వ్యక్తి ఇంట్లో ఏకంగా దొంగనోట్ల కుటీర పరిశ్రమే పెట్టేశాడు.