Tirumala : తిరుమలలో శ్రీవారి దర్శనం సులువుగా.. ఎంత సమయమో తెలిస్తే?

మొంథా తుపాను ఎఫెక్ట్ తిరుమలపైన కూడా పడింది. ప్రధానంగా ఆంధ్రప్రదేశ్, తమిళనాడు జిల్లాల్లో భారీ వర్షాలు పడుతుండటంతో పాటు వాతావరణ శాఖ చేసిన హెచ్చరికలతో భక్తులు తిరుమలకు వచ్చేందుకు భయపడిపోతున్నారు. అయితే ముందుగా ప్రత్యేక దర్శనం టిక్కెట్లు బుక్ చేసుకున్న వారు మాత్రం వస్తున్నారు. భారీ వర్షాల నేపథ్యంలో తిరుమలకు వచ్చే భక్తులు ఘాట్ రోడ్ లో ప్రయాణం ప్రమాదకరంగా ఉంటుందని, జాగ్రత్తగా తిరుమలకు చేరుకోవాలని తిరుమల తిరుపతి దేవస్థానం అధికారులు కోరుతున్నారు.

ఈరోజు తిరుమలలోని వైకుంఠం క్యూ కాంప్లెక్స్ లోని నాలుగు కంపార్ట్ మెంట్లలోనే భక్తులు శ్రీవారి దర్శనం కోసం వేచి ఉన్నారు. ఉదయం సర్వదర్శనం క్యూ లైన్ లోకి టోకెన్లు లేకుండా ప్రవేశించిన భక్తులకు శ్రీవారి దర్శనం ఎనిమిది గంటల సమయం మాత్రమే పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు శ్రీవారి దర్శనం మూడు గంటల్లో పూర్తవుతుంది. మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన భక్తులకు శ్రీవారి దర్శనం రెండు గంటల సమయం మాత్రమే పడుతుంది. నిన్న తిరుమల శ్రీవారిని 70,842 మంది భక్తులు దర్శించుకున్నారు. వీరిలో s : 25,125 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 4.47 కోట్ల రూపాయలు వచ్చిందని అధికారులు తెలిపారు.