Tirumala : తిరుమలకు నేడు వెళుతున్నారా? వెళితే వెయిటింగ్ టైం ఎంతంటే?

తిరుమలకు ఒక సీజన్ అంటూ లేకుండా పోయింది. గతంలో వేసవిలో మాత్రమే ఎక్కువ రద్దీ ఉండేది. అయితే ఇప్పుడు దేశం నలుమూలల నుంచి తిరుమలకు వచ్చే భక్తుల సంఖ్య రోజురోజుకూ ఎక్కువవుతుంది. తిరుమల శ్రీవారి హుండీ ఆదాయం కూడా పెరుగుతుంది. నెలకు దాదాపు వంద కోట్ల రూపాయలకు పైగానే వస్తుందని తిరుమల తిరుపతి దేవస్థానం అధికారులు తెలిపారు. పండగలు, సెలవులు మాత్రమే కాకుండా తిరుమల శ్రీ వెంకటేశ్వరస్వామిని దర్శించుకునేందుకు వారంలో ఏడు రోజుల పాటు తిరుమలకు భక్తులు చేరుకుంటున్నారు.

ఈరోజు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్ మెంట్లు భక్తులతో నిండిపోయాయి. శిలాతోరణం వరకూ భక్తుల క్యూ లైన్ విస్తరించింది. సర్వ దర్శనం క్యూ లైన్ లోకి ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం ఇరవై గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు ఏడు గంటల నుంచి ఎనిమిది గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన భక్తులకు శ్రీవారి దర్శనం మూడు నుంచి నాలుగు గంటల సమయం పడుతుంది. నిన్న తిరుమల శ్రీవారిని 68,095 మంది భక్తులు దర్శించుకున్నారు. వీరిలో 23,932 మంది భక్తులు తమ తలనీలాలను సమర్పించుకున్నారు. నిన్న తిరుమల శ్రీవారి హుండీ ఆదాయం 3.70 కోట్ల రూపాయలు వచ్చిందని అధికారులు తెలిపారు.