Telangana : తిరుమలకు నేడు వెళుతున్నారా? అయితే అలెర్ట్ గా ఉండాల్సిందే

కంపార్ట్మెమెంట్లన్నీ నిండిపోయి బయట వరకూ క్యూ లైన్ నిండిపోయి ఉన్నప్పుడు భక్తులకు క్యూ లైన్ల వద్ద పన్నెండు కౌంటర్లు పెట్టి ఉచితంగా అన్న ప్రసాదాలను, మజ్జిగను పంపిణీ చేస్తున్నారు. శ్రీవారి సేవకులను వినియోగించుకుని భక్తులు ఇబ్బందులు పడకుండా అవసరమైన చర్యలు తీసుకుంటున్నారు. ఎక్కువ సేపు క్యూ లైన్ లో ఉండటంతో భక్తులకు అవసరమైన అన్ని రకాల సదుపాయాలను కల్పిస్తున్నామని, త్వరలోనే ఏఐ ద్వారా రెండు, మూడు గంటల్లో స్వామి వారి దర్శనం అయ్యేలా చర్యలు తీసుకుంటామని తిరుమల తిరుపతి దేవస్థానం అధికారులు చెబుతున్నారు.

ఈరోజు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్ మెంట్లు భక్తులతో నిండిపోయాయి. బయట కృష్ణతేజ అతిథి గృహం వరకూ భక్తుల క్యూ లైన్ నిండిపోయింది. ఉచిత దర్శనం క్యూ లైన్ లోకి ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం ఇరవై నాలుగు గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు ఏడు గంటలకు పైగానే సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం నాలుగు నుంచి ఐదు గంటల సమయం పడుతుంది. నిన్న తిరుమల శ్రీవారిని 65,112మంది భక్తులు దర్శించుకున్నారు. వీరిలో 27,331 మంది భక్తులు తమ తలనీలాలను సమర్పించుకున్నారు. నిన్న తిరుమల శ్రీవారి హుండీ ఆదాయం 3.49 కోట్ల రూపాయలు వచ్చిందని అధికారులు తెలిపారు.