పులివెందుల ఎమ్మెల్యేగా జగన్ అసెంబ్లీకి రావాల్సిందే
వైసీపీలో గెలిచిన ఎమ్మెల్యేలను దురదృష్టం వెంటాడుతుందని హోం మంత్రి వంగలపూడి అనిత అన్నారు.
వైసీపీలో గెలిచిన ఎమ్మెల్యేలను దురదృష్టం వెంటాడుతుందని హోం మంత్రి వంగలపూడి అనిత అన్నారు. ప్రకాశం జిల్లా ఒంగోలులో పర్యటించిన అనిత అసెంబ్లీకి వెళ్లి అధ్యక్షా అనాలని అందరికీ కల ఉంటుందని అన్నారు. జగన్ పుణ్యమా అని వైసీపీలో గెలిచిన ఎమ్మెల్యేలను దురదృష్టం వెంటాడుతుందని తెలిపారు. అసెంబ్లీకి వెళ్ళే అవకాశం జగన్ ఎమ్మెల్యేలకు ఇవ్వకపోవడం దురదృష్టమన్న అనిత ప్రజా సమస్యలు చర్చించడానికి అసెంబ్లీ ఒక మంచి వేదిక అని అన్నారు. జగన్ కి ప్రతిపక్ష హోదా స్పీకర్ ఇచ్చే ది కాదన్న హోం మంత్రి వంగలపూడి అనిత ప్రతిపక్ష హోదా ప్రజలు ఇవ్వాలన్నారు. ప్రతిపక్ష హోదా ఇచ్చే సీట్లు రాలేదు కాబట్టి పులివెందుల ఎమ్మెల్యేగా జగన్ అసెంబ్లీకి రావాలన్నారు.
చిన్నపిల్లాడిలా...
ప్రతిపక్ష హోదా కావాలని చిన్నపిల్లాడిలా జగన్ మారాం చేస్తున్నాడని, ప్రతిపక్ష హోదా చాక్లెటో, బిస్కెటో కాదన్న హోం మంత్రి వంగలపూడి అనిత గత వైసిపి ప్రభుత్వంలో అసెంబ్లీలో చంద్రబాబుని అవమానిస్తే ఆయన వాకౌట్ చేసి వెళ్లిపోయారని తెలిపారు. టిడిపి ఎమ్మెల్యేలను అసెంబ్లీకి వెళ్లొద్దని చంద్రబాబు చెప్పలేదని అనిత గుర్తుచేశారు. టిడిపి ఎమ్మెల్యేలు గత ప్రభుత్వంలో అసెంబ్లీకి వచ్చి పోరాటం చేశారని, జగన్ అసెంబ్లీకి రాకపోతే మిగిలిన వైసీపీ ఎమ్మెల్యేలను అసెంబ్లీకి పంపాలని, జగన్ రాకపోతే అసెంబ్లీ ఆగదని, 11 మంది రాజీనామా చేసి వెళ్తే నష్టమేమీ లేదని తెలిపారు. లిక్కర్ స్కామ్ పై విచారణ జరుగుతుందన్న హోం మంత్రి వంగలపూడి అనిత విచారణ పూర్తయిన తర్వాత లిక్కర్ స్కామ్ పై మాట్లాడుతామన్నారు.