మరో తుపాను ఆవర్తనం.. నేడు, రేపు అత్యంత భారీ వర్షాలు

వాయువ్య బంగాళాఖాతంలో ఏర్పడిన అల్పపీడనం ఏపీ, ఒడిశా తీరప్రాంతాలకు చేరువలో తీవ్ర అల్పపీడనంగా కొనసాగుతోంది. దీనికి అనుబంధంగా 7.6 కిలోమీటర్ల ఎత్తున మరో తుపాను ఆవర్తనం కూడా ఏర్పడినట్లు వాతావరణశాఖ వెల్లడించింది. వీటి ప్రభావంతో నేడు, రేపు అతిభారీ నుంచి అత్యంత భారీ వర్షాలు కురుస్తాయని హైదరాబాద్ వాతావరణ కేంద్రం హెచ్చరించింది. తెలంగాణలో ఏడు జిల్లాలకు రెడ్ అలర్ట్, 10 జిల్లాలకు ఆరెంజ్, మరో 15 జిల్లాలకు ఎల్లో అలర్ట్ జారీ చేసింది. భారీ వర్షాలకు 40-50 కిలోమీటర్ల వేగంతో ఈదురుగాలులు కూడా వీస్తాయని తెలిపింది. గడిచిన 24 గంటల్లో నిజామాబాద్, వరంగల్ జిల్లాల్లో కుంభవృష్టిగా వర్షాలు కురిశాయి. వేల్పూర్ లో అత్యధికంగా 40 సెంటీమీటర్ల వర్షపాతం నమోదైంది.