Andhra Pradesh : తొలి సంతకానికి నేడు నోటిఫికేషన్.. మెగా డీఎస్సీ ప్రకటన నేడే

కూటమి ప్రభుత్వం అధికారంలోకి రాగానే ముఖ్యమంత్రి చంద్రబాబు నాయుడు తొలి సంతకం మెగా డీఎస్సీ ఫైలు పైనే పెట్టారు. అయితే టెట్ పరీక్ష ను నిర్వహించాల్సి రావడంతో పాటు మరి కొన్నికారణాల వల్ల ఈ మెగా డీఎస్సీ నోటిఫికేషన్ ఎప్పటికప్పుడు వాయిదా పడుతూ వచ్చింది. ఎన్నికల్లో ఇచ్చిన హామీ మేరకు నిరుద్యోగులకు సంబంధించిన హామీని నెరవేరుస్తామని చంద్రబాబు చెప్పారు. అనుకున్నట్లుగానే ఈరోజు మెగా డీఎస్సీ నోటిఫికేషన్ ను విడుదల చేయనున్నారు. ఉదయం పది గంటలకు విడుదల చేయనున్నారు. ఈ సమయం నుంచి విద్యాశాఖ వెబ్ సైట్ లో వివరాలు అందుబాటులో ఉంటాయి.

ఉపాధ్యాయ పోస్టుల వివరాలతో పాటు పరీక్ష షెడ్యూల్, సిలబస్, సహాయ కేంద్రాల వివరాలను వెబ్ సైట్ లో ఉంచనున్నారు. మొత్తం మెగా డీఎస్సీలో 16,347 పోస్టులు భర్తీ కానుండటంతో టీచర్ పోస్టులకు దరఖాస్తు చేసుకునే వారంతా ఈ పరీక్షకు ప్రిపేర్ అయ్యే అవకాశం ఇచ్చారు. జిల్లా స్థాయిలో 14,088 పోస్టులు, గిరిజన ఆశ్రమ పాఠశాలలు, జువైనల్ సంక్షేమ పాఠశాలలతో పాటుగా రాష్ట్ర స్థాయి, జోనల్ స్థాయిలో 2,259 పోస్టులను భర్తీ చేయనున్నారు. ఆన్ లైన్ ద్వారా ఫీజు చెల్లించవచ్చు. మే 30వ తేదీ నుంచి హాల్ టికెట్లు అభ్యర్థులు డౌన్ లోడ్ చేసుకోవచ్చు. జూన్ 6వ తేదీ నుంచి జులై 6వ తేదీ వరకూ పరీక్షలు నిర్వహించనున్నారు. అన్ని పరీక్షలు పూర్తయిన తర్వాత మాత్రమే ప్రాధమిక కీ విడుదల చేయనున్నారు.