సత్తెనపల్లి టీడీపీ అభ్యర్థి ఖరారైనట్లే

సత్తెనపల్లి నియోజకవర్గంలో టీడీపీ అభ్యర్థి ఆల్ మోస్ట్ కన్ఫర్మ్ అయినట్లే..! మంత్రి అంబటి రాంబాబుపై టీడీపీ అభ్యర్థి ఎవరనే విషయమై ఇన్ని రోజులూ కాస్త సస్పెన్స్ కొనసాగినా.. కన్నా లక్ష్మీనారాయణ తప్ప ఇంకెవరూ కాదని అందరికీ అర్థం అయిపోయింది. టీడీపీ అధినాయకత్వం సత్తెనపల్లి నియోజకవర్గ ఇన్చార్జిగా కన్నాను నియమించింది. టీడీపీ జాతీయ అధ్యక్షుడు చంద్రబాబు ఆదేశాల మేరకు సత్తెనపల్లి నియోజకవర్గ టీడీపీ ఇన్చార్జిగా కన్నా లక్ష్మీనారాయణను నియమించినట్టు టీడీపీ రాష్ట్ర అధ్యక్షుడు అచ్చెన్నాయుడు ఓ ప్రకటనలో వెల్లడించారు. మంత్రి అంబటికి దీటైన అభ్యర్థి కన్నానే అని టీడీపీ భావిస్తున్నట్టు దీంతో స్పష్టమైంది. కన్నా ఇటీవల బీజేపీకి రాజీనామా చేసి టీడీపీలో చేరారు. ఎన్నికలకు మరికొన్ని నెలల సమయమే ఉండడంతో నియోజకవర్గాల వారీగా ఇన్చార్జిల నియామకంలోనూ దూకుడు పెంచింది. సత్తెనపల్లి నియోజకవర్గ టీడీపీ ఇన్చార్జి రేసులో జీవీ ఆంజనేయులు, కోడెల శివప్రసాద్ తనయుడు కోడెల శివరామకృష్ణ కూడా ఉన్నట్టు ప్రచారం జరిగింది. అయితే, టీడీపీ నాయకత్వం కన్నా వైపు మొగ్గు చూపించింది.