Bhuma Akhila Priya : టీడీపీ హైకమాండ్ కు భూమా మాస్ వార్నింగ్.. వారికి పదవులు ఇచ్చారో?

అయితే భూమా అఖిలప్రియ వార్నింగ్ ఇచ్చింది కేవలం ఏవీ సుబ్బారెడ్డి విషయంలోనే అని చెప్పకనే తెలుస్తుంది. గతంలో 2014లో టీడీపీ కూటమి అధికారంలోకి వచ్చినప్పుడు కూడా ఏవీ సుబ్బారెడ్డికి నామినేటెడ్ పదవిని పార్టీ నాయకత్వం కట్టబెట్టింది. ఈసారి కూడా అలాంటి ప్రయత్నాలు జరుగుతున్నాయన్న ఉప్పందడంతో అఖిలప్రియ ఈ వార్నింగ్ ఇచ్చినట్లు తెలిసింది. ఏవీ సుబ్బారెడ్డికి ఏ పదవి ఇచ్చినా తాను అంగీకరించబోనని నేరుగా చెప్పకుండా ఈ రకమైన వార్నింగ్ ను అమారావతిలోని పార్టీ కేంద్ర కార్యాలయానికి పంపినట్లు తెలిసింది. నామినేటెడ్ పోస్టులను మహానాడులోపు భర్తీ చేస్తానని ప్రకటించడం, అనేక పోస్టుల భర్తీ అవుతుండటంతో అఖిలప్రియ ఈ ప్రకటన చేశారంటున్నారు.

భూమా అఖిలప్రియ సంచలన వ్యాఖ్యలు పార్టీలో చర్చనీయాంశమైంది. ఆళ్లగడ్డలో జరిగిన మినీ మహానాడులో ఈ వ్యాఖ్యలు చేశారు. పార్టీకి అంకితమైన వారికి, తమకు అంకిత మైన వారికి మాత్రమే పదవులు ఇవ్వాలని అన్నారు. ముక్కూ మొహం తెలియని వాళ్లు ఏదైనా పదవి తీసుకుంటే మాత్రం తాను అంగీకరించబోనని తెలిపారు. పార్టీ నుంచి మొదటి నుంచి పనిచేస్తున్న వారికి, తొలి నుంచి ఉన్న వారికి పదవులు ఇవ్వాలని అఖిలప్రియ కోరారు. అంతే తప్ప పైరవీలు చేసుకుని వచ్చే వారిని ప్రోత్సహిస్తే ఊరుకోబోమని కూడా మినీ మహానాడు వేదికగా ఆమె గట్టి వార్నింగ్ ఇవ్వడం ఇప్పుడు పార్టీలో కలకలం రేపుతుంది. మరి అఖిలప్రియ కామెంట్స్ ను హైకమాండ్ ఏ రకంగా తీసుకుంటుందన్నది చూడాలి.