فیکٹ چیک: سانگلی لاٹھی چارج کا فروری 2025 کا ویڈیو اترپردیش کی نماز تراویح سے جوڑکر فرضی دعوے کے ساتھ وائرل

اس درمیان سوشل میڈیا پر چند بائیک سوار نوجوانوں پر لاٹھی چارج کا ویڈیو شیئر کرتے ہوئے دعویٰ [آرکائیو] کیا جارہا ہیکہ "مسجد میں تراویح کی نماز ادا کی جا رہی تھی اور مسجد کے باہر پولیس اہلکار حفاظت کے لئے تعینات کئے گئے تھے۔ بجرنگ دل کے کارکنوں نے جب مسجد کے قریب پہنچ کر شوروغل مچایا تو پولیس نے لاٹھی ڈنڈوں سے انکی پٹائی کی۔"

وائرل پوسٹ کا لنک یہاں اور آرکائیو لنک یہاں ملاحظہ کیا جاسکتا ہے۔

وائرل پوسٹ کا اسکرین شاٹ درج ذیل ہے۔

تلگو پوسٹ کی فیکٹ چیک ٹیم نے وائرل پوسٹ میں کئے گئے دعوے اور ویڈیو کی جانچ پڑتال کی تو پایا کہ یہ ویڈیو اترپردیش میں تراویح کے دوران مسجد کے باہر شرپسندوں پر پولیس کی لاٹھیاں برسانے کا منظر پیش نہیں کررہا ہے بلکہ یہ واقعہ 18 فروری 2025 کو مہاراشٹرا میں پیش آیا تھا۔ سانگلی کی پولیس نے بجرنگ دل کے کارکنوں پر نہیں بلکہ شور مچانے والےعام بائیک سواروں پر لاٹھی چارج کیا تھا۔

تحقیق کا آغاز کرتے ہوئے ہم نے جب موزوں الفاظ سے گوگل سرچ کیا تو ہمیں تراویح سے متعلق اترپردیش میں صلوٰۃ تراویح میں تلاوت قرآن پاک کی تکمیل سے متعلق ہندی نیوز پورٹلس پر کچھ خبریں ملی تاہم، نماز تراویح کے دوران مسجد کے باہر ہندو تنظیم کے ممبروں کی ہہنگامہ آرائی اور پولیس ایکشن کے حوالے سے کوئی خبر نہیں ملی۔

پھر ہم نے وائرل ویڈیو کے کلیدی فریمس کی مدد سے گوگل لینس میں سرچ کیا تو ہمیں 19 فروری 2025 کا 'ٹائمس آف انڈیا' کا آرٹیکل ملا۔ اس مضمون میں بتایا گیا ہیکہ، " منگل کی رات تقریباً 2 بجے، سینکڑوں موٹرسائیکل سوار کرناٹک کے سالانہ میلے سے سانگلی واپس لوٹتے وقت زور زور سے ہارن بجاکر علاقہ میں شوروغل مچا رہے تھے۔نتیجے میں پولیس نے ان پر لاٹھی چارج کیا۔ اس کارروائی میں تقریباً 45 افراد معمولی زخمی ہوئے جبکہ کئی دیگر اپنی موٹرسائیکلیں وہیں چھوڑ بھاگ کھڑے ہوئے۔

نیوز رپورٹ میں سانگلی رورل پولیس اسٹیشن کے انسپکٹر کرن چوگلے کا بیان بھی شامل کیا گیا ہے۔ چوگلے نے بتایا کہ"سانگلی شہر میں گھوڑا گاڑی کی دوڑ کی کوئی اجازت نہیں ہے۔ اس کے باوجود کئی نوجوان اپنی گھوڑا گاڑیاں دوڑاتے ہوئے آئے اور ان کے ساتھ چلنے والے بائیک سوار شور مچانے لگے، زور زور سے نعرے لگائے اور ہارن بجانے لگے۔ ہم نے سانگلی میں پولیس بندوبست کیا ہوا تھا اور ہمارے پاس کوئی دوسرا راستہ نہیں تھا سوائے لاٹھی چارج کرنے کے تاکہ انہیں روکا جا سکے۔ ہمیں سخت احکامات ملے تھے کہ علاقہ میں ہر قسم کی ہنگامہ آرائی کو روکنا ہے۔ اس شور کی وجہ سے رہائشیوں کی نیند خراب ہورہی تھی اور انہوں نے بھی ان بائیک سواروں کے خلاف کارروائی کا مطالبہ کیا تھا۔"

اس جانکاری کی مدد سے جب ہم نے اپنی تحقیق کا دائرہ بڑھایا تو ہمیں 'سام ٹی وی' کے یوٹیوب چینل بریکنگ نیوز کے نام سے ایک خبر ملی۔ مراٹھی زبان میں ویڈیو کا ٹائیٹل کچھ اسطرح دیا گیا تھا۔ 'سانگلی میں ایک حیرت انگیز واقعہ پیش آیا: صرف چار پولیس اہلکاروں نے ہزاروں شور مچانے والوں کو بھاگنے پر مجبور کر دیا۔'