Free Gas Cyllender : ఉచిత గ్యాస్ సిలిండర్ మీరు తీసుకోలేదా? అయితే నెలాఖరు లాస్ట్ డేట్
ఆంధ్రప్రదేశ్ లో మహిళలకు ప్రభుత్వం ఉచిత గ్యాస్ సిలిండర్ పథకం అమలవుతుంది
ఆంధ్రప్రదేశ్ లో మహిళలకు ప్రభుత్వం ఉచిత గ్యాస్ సిలిండర్ పథకం అమలవుతుంది. మహిళలు పెద్దయెత్తున ఈ అవకాశాన్ని వినియోగించుకుంటున్నారు. దీపావళి పండగ రోజు ఈ పథకాన్ని ముఖ్యమంత్రి చంద్రబాబు నాయుడు ప్రారంభించారు.ఇప్పటికే దాదాపు కోటికి పైగా సిలిండర్లను పంపిణీ చేసినట్లు ప్రభుత్వ వర్గాలు వెల్లడించాయి. అయితే అర్హులైన వారికి ఏపీ ప్రభుత్వం తాజాగా అలెర్ట్ జారీ చేసింది. దీపం-2' పథకంలో ఉచిత గ్యాస్ సిలిండర్ ఇప్పటికీ తీసుకోనివారు ఈ నెలఖారులోగా మొదటిది బుక్ చేసుకోవాలని పౌర సరఫరాల శాఖ కమిషనర్ సౌరభ్ గౌర్ సూచించారు. లేదంటే మూడు సిలిండర్లలో ఒకటి కోల్పోతారని చెప్పారు. ఏప్రిల్ నుంచి రెండో సిలిండర్ బుకింగ్లు ప్రారంభమవుతాయన్నారు.
ఇప్పటి వరకూ...
ఈ పథకం కింద ఇప్పటివరకు 97 లక్షల మంది లబ్ధిదారులు ఉచిత గ్యాస్ బుక్ చేసుకున్నట్లు ఆయన వెల్లడించారు. ఉచితంగా ఏడాదికి మూడు ఉచిత గ్యాస్ సిలిండర్లు ఇస్తుండటంతో తమ గ్యాస్ ఏజెన్సీల వద్ద కేవైసీ చేయించుకుని మరీ బుక్ చేసుకున్నారు. ఆంధ్రప్రదేశ్ లో ఉన్న 1.55 కోట్ల మంది లబ్దిదారులు అర్హులుగా గుర్తించారు. ఇందుకోసం ప్రభుత్వం 2,684 కోట్ల రూపాయల నిధులను ప్రభుత్వం ముందుగానే విడుదల చేసింది. తాజాగా మొన్న సభలో పెట్టిన బడ్జెట్ లో కూడా ఉచిత గ్యాస్ పథకానికి నిధులను కేటాయించింది. ఇక ఈ నెలాఖరులోగా ఇప్పటి వరకూ బుక్ చేసుకోని వారు బుక్ చేసుకోకపోతే ఏడాదికి వచ్చే మూడు సిలిండర్లలో ఒకటి కోల్పోతారు.
ఏడాదికి మూడుసార్లు...
ఏడాదికి మూడు సార్లుఈ దీపం 2 పథకాన్ని అమలు చేస్తారు. తొలి సిలిండర్ బుక్ చేసుకోవడానికి అక్టోబరు 29వ తేదీ నుంచి వచ్చే ఏడాది మార్చి 31వ తేదీ వరకూ బుక్ చేసుకునే వీలుకల్పించారు. ప్రతి ఏడాది ఏప్రిల్1 తేదీ నుంచి జూలై 1వ తేదీ వరకూ రెండో సిలిండర్, ఆగష్టు ఒకటో తేదీ –నవంబర్ ఒకటో తేదీ వరకూ మూడో సిలిండర్ బుక్ చేసుకోవచ్చు. తేదీలతో సంబంధం లేకుండా నాలుగు నెలలకు ఒకసారి బుక్ చేసుకునే అవకాశం కల్పించారు. తెలుపురంగు రేషన్ కార్డు, ఎల్.పి.జి కనెక్షన్ కలిగి ఉండటంతో పాటు ఆధార్ కార్డు ఉన్నవారంతా అర్హులే. అయితే ఇప్పటి వరకూ బుక్ చేసుకోని వారికి మాత్రంర ఇక పదిహేడు రోజులు మాత్రమే టైం ఉంది. ఉచిత సిలిండర్ అందకుంటే 1967 టోల్ ఫ్రీ నెంబరుకు ఫోన్ చేసి సమాచారాన్ని పొందవచ్చు