IPL 2024 : ఏదో చేద్దామనుకుంటే.. మరేదో అయింది.. ప్లాన్ రివర్స్ కావడంతో ఫ్లాప్ అయిన సన్ రైజర్స్.. ఫైనల్స్ కు కేకేఆర్

నిన్న అహ్మదాబాద్ లో జరిగిన మ్యాచ్ చూసిన వారికి ఎవరికైనా తొలుత బ్యాటింగ్ ఎంచుకుని తప్పు చేశారా? అన్న భావన సన్ రైజర్స్ హైదరాబాద్ విషయంలో కలుగుతుంది. నిన్న జరిగిన మ్యాచ్ లో సన్ రైజర్స్ హైదరాబాద్ కోల్‌కత్తా నైట్ రైడర్స్ చేతిలో దారుణంగా ఓటమిపాలయింది. 6.2 ఓవర్లు మిగిలి ఉండగానే లక్ష్యాన్ని కేకేఆర్ ఛేదించగలిగింది. దీంతో మరో మ్యాచ్ సన్ రైజర్స్ హైదరాబాద్ ఆడాల్సి ఉంది. అది గెలిస్తే ఫైనల్స్ కు చేరుకునే అవకాశాలున్నాయి. కనీసం ఆసక్తి లేకండా క్వాలిఫయిర్ మ్యాచ్ జరిగిందంటే.. దానికి కారణం సన్ రైజర్స్ హైదరాబాద్ బ్యాటర్లే కారణం. ఎవరూ నిలబడలేదు. ఇప్పటి వరకూ మైదానంలో వీర విహారం చేసిన వారు కేకేఆర్ బౌలర్ల దెబ్బకు పెవిలియన్ బాట పట్టారు. అసలు ఒక దశలో వంద స్కోరు అయినా చేస్తుందా? అన్న అనుమానం కూడా కలిగిందంటే ఆశ్చర్యం కలగక మానదు.

తొలుత బ్యాటింగ్ చేసిన సన్ రైజర్స్ హైదరాబాద్ జట్టులో ఓపెనర్ గా వచ్చి హెడ్ డకౌట్ అయ్యాడు. అభిషేక్ శర్మ మూడు పరుగులకే వెనుదిరిగాడు. త్రిపాఠి ఒక్కడే పోరాటంచేసి 55 పరుగులు చేభాడు, నితీష్ కుమార్ రెడ్డి 9 పరుగులకే పెవిలియన్ బాట పట్టాడు. షాబాజ్ డకౌట్ అయ్యాడు. క్లాసెన్ కాసేపు అలరించినా 32 పరుగులు వద్ద క్యాచ్ ఇచ్చి వెనుదిరిగాడు. స్టార్క్ దెబ్బకు సన్ రైజర్స్ హైదరాబాద్ బ్యాటర్లు విలవిలలాడిపోయారు. 19.3 ఓవర్లలోనే ఆలౌల్ అయి 159 పరుగులు మాత్రమే చేశారు.

ఇక పెద్ద స్కోరు కాకపోవడంతో కోల్‌కత్తా నైట్ రైడర్స్ విజయం ముందే ఖాయమయింది. టీవీలన్నీ కట్టేశారు. గుర్బాజ్ 23 పరుగులు చేసి అవుటయ్యాడు. నరైన్ 21 పరుగుల వద్ద వెనుదిరిగాడు. వెంకటేశ్ అయ్యర్ 51 పరుగులు, శ్రేయస్ అయ్యర్ 55 పరుగులు చేసి నాటౌట్ గా నిలిచి పనిని పూర్తి చేశారు. దీంతో కోల్‌కత్తా నైట్ రైడర్స్ ఫైనల్స్ కు చేరుకుంది. కానీ సన్ రైజర్స్ హైదరాబాద్ దారుణ ఓటమిని చూడాల్సి వచ్చింది. మరో మ్యాచ్ మిగిలి ఉండటంతో ఇంకా ఆశలు మాత్రం ఉన్నాయి.