IPL 2024 : సమ ఉజ్జీలు పోటీ పడితే అంతే... నువ్వు వంద కొడితే.. నేను కొట్టలేనా?

నిన్న జరిగిన రాజస్థాన్ రాయల్స్ తో కోల్‌కత్తా నైట్ రైడర్స్ మ్యాచ్ లో రెండు శతకాలు నమోదయ్యాయి. పాయింట్ల పట్టికలో మొదటి స్థానంలో రాజస్థాన్ రాయల్స్ ఉండగా, రెండో స్థానంలో కోల్‌కత్తా నైట్ రైడర్స్ ఉంది. మొదటి స్థానాన్ని పదిలం చేసుకోవాలని రాయల్స్, ఫస్ట్ ప్లేస్ దక్కించుకోవాలని రైడర్స్ రెండూ తమ ఆట రుచిని చూపించాయి. అయితే చివరకు రాజస్థాన్ రాయల్స్ తో కోల్‌కత్తా నైట్ రైడర్స్ మ్యాచ్ లో రాజస్థాన్ రాయల్స్ దే విజయం అయింది. మొదటి ప్లేస్ ను పదిలం చేసుకుంది. రెండు జట్లను అభినందించకుండా ఉండలేం. భారీ స్కోరు అని బ్యాట్ తడబడ లేదు. బంతి గతి తప్పలేదు. అంత సవ్యంగా జరిగి విక్టరీని రాయల్స్ తమ చేతికి చిక్కించుకుంది.

తొలుత బ్యాటింగ్ చేసిన కోల్‌కత్తా నైట్ రైడర్స్ ఆరు వికెట్లు కోల్పోయి 223 పరుగులు చేసింది. ఐపీఎల్ లో ఇది భారీ స్కోరు. ఇందులో సునీల్ నరేన్ 109 పరుగులు చేశాడు. రఘువంశీ 30 పరుగులు చేశాడు. రింకూ సింగ్ ఇరవై పరుగులు చేశాడు. స్కోరు బోర్డును పరుగులు తీయించాడు. ఆరు వికెట్లు పడ్డాయని రాజస్థాన్ రాయల్స్ సంతోషించలేదు. అలాగే 223 భారీ లక్ష్యమని కుంగిపోలేదు. తర్వాత బరిలోకి దిగి అనుకున్న లక్ష్యాన్ని సాధించింది. ఇరవై ఓవర్లలో ఎనిమిది వికెట్లు కోల్పోయి 224 పరుగులు చేసింది. బట్లర్ 107 పరుగులు చేసి అవుట్ కాకుండా క్రీజునే అంటిపెట్టుకుని ఉన్నాడు. వచ్చిన వారు వచ్చినట్లు వెళుతున్నా తాను మాత్రం చెక్కు చెదరని విశ్వాసంతో బట్లర్ బాదిన బాదుడు మాత్రం చూసి తీరాల్సిందే. అలా రాజస్థాన్ రాయల్స్ లో బట్లర్, నైట్ రైడర్స్ లో నరేన్ లు వీరబాదుడు బాది ఫ్యాన్స్ ను అలరించారు. అబ్బురపర్చే షాట్లతో స్టేడియంలో మోత పుట్టించారు.