గాంధీజీ ఆయిల్ పెయింటింగ్ 1.75 కోట్లు

మహాత్మాగాంధీకి చెందిన అరుదైన ఆయిల్ పెయింటింగ్ ఏకంగా కోటి 75 లక్షల రూపాయలు పలికింది. తాము అంచనా వేసిన దానికంటే ఎక్కువ మొత్తానికి ఈ చిత్రం అమ్ముడుపోయిందని లండన్ కు చెందిన వేలం సంస్థ బోన్హామ్స్ చెప్పడం విశేషం. భారత రాజ్యాంగ సంస్కరణలను చర్చించడానికి, స్వపరిపాలన డిమాండ్లను పరిష్కరించడానికి జరిగిన రెండవ రౌండ్ టేబుల్ సమావేశానికి 1931లో గాంధీ లండన్ వెళ్లారు. ఆ సమయం లో బ్రిటిష్ కళాకారిణి క్లేర్ లైటన్ ఈ చిత్రాన్ని రూపొందించారు. గాంధీజీ కూర్చుని ఉన్న ఏకైక ఆయిల్ పెయింటింగ్ ఇదేనని బోన్హామ్స్ సంస్థ తెలిపింది. ఆ సమయంలో గాంధీజీ కార్యాలయంలోకి ప్రవేశించిన అతికొద్ది మంది కళాకారుల్లో క్లేర్ లైటన్ కూడా ఒకరు.