ప్రస్తుతం టాలీవుడ్ మొత్తం ఎన్టీఆర్ అరవింద సమేత మేనియా నడుస్తుంది. రేపు విడుదల కాబోతున్న ఎన్టీఆర్ అరవింద సమేత మీద భారీ అంచనాలే ఉన్నాయి. అయితే అరవింద సమేత హడావిడి లో విజయ్ దేవరకొండ నోటా సినిమా మరుగున పడిపోయింది. విజయ్ దేవరకొండ హీరోగా తమిళంలో తెరకెక్కిన నోటా సినిమా గత శుక్రవారమే విడుదలైంది. గీత గోవిందంతో బ్లాక్ బస్టర్ హిట్ కొట్టి 100 కోట్ల క్లబ్బులోకి అడుగుపెట్టిన విజయ్ దేవరకొండకి నోటాతో షాక్ తగిలింది. ఇక నోటా ఫ్లాప్ తో విజయ్ దేవరకొండ మార్కెట్ కూడా కాస్త అటు ఇటుగా అతలాకుతలం అయ్యినట్లుగానే కనబడుతుంది. మరి గీత గోవిందం బ్లాక్ బస్టర్ హిట్ కొట్టినప్పుడే విజయ్ దేవరకొండ టాక్సీవాలా చిత్రం విడుదల కావడానికి అష్టకష్టాలు పడింది. ఎప్పుడో షూటింగ్ పూర్తయ్యి... విజయ్ కి ఉన్న క్రేజ్ తో సినిమా విడుదలవుతుంది అనుకుంటే.. ఆ సినిమాకి ఇప్పట్లో మోక్షం కలిగేలా కనబడడం లేదు.
ఒక్క ఫ్లాప్ తో తగ్గిపోయిన క్రేజ్
గీత గోవిందం కన్నా ముందు విడుదల కావల్సిన టాక్సీవాలా సినిమా ఇప్పటికి విడుదల కాలేదు. మధ్యలో టాక్సీవాలా సినిమా ఇంటర్నెట్ లో లీక్ అవడం, నిర్మాత ఆ లీకుదారులను పోలీసులకు పట్టివ్వడం.. తర్వాత సినిమా ఆన్ లైన్ లో వైరల్ కాకుండా ఆపడం.. ఇలా చాలా పెద్ద తతంగమే నడిచింది. ఇక ఈ నోటా దెబ్బకి టాక్సీవాలా పరిస్థితి మరింత దారుణంగా తయారయ్యేలా కనబడుతుంది. నోటా హిట్ అయితే విజయ్ క్రేజ్ తో టాక్సీవాలాను థియేటర్స్ లోకి దింపే వారు మేకర్స్. కానీ నోటా టాక్ తేడా కొట్టడంతో.. ఇప్పుడు టాక్సీవాలా సినిమాకి కష్టాలు మరింత పెరిగిపోయాయి. ఇక ఎలాగూ టాక్సీవాలా సినిమాని డైరెక్ట్ గా ఆన్ లైన్ లో విడుదల చేద్దామని మేకర్స్ గతంలో అనుకున్నట్లుగా వార్తలొచ్చాయి. కానీ ఆ మేటర్ మాత్రం ప్రస్తుతం ఎక్కడా వినబడడం లేదు. ఏది ఏమైనా విజయ్ తమిళ డెబ్యూ నిర్ణయం మాత్రం తేడా కొట్టడమే కాదు.. విజయ్ క్రేజ్ ని బాగా తగ్గించేసిందనే చెప్పాలి.