దివంగత నటుడు అక్కినేని నాగేశ్వరరావు స్థాపించిన అన్నపూర్ణ స్టూడియోస్ నుండి చాలా మంచి సినిమాలు వచ్చిన సంగతి తెలిసిందే. ప్రస్తుతం ఉన్న పెద్ద సంస్థల్లో ఇది కూడా ఒకటి. అన్నపూర్ణ బ్యానర్ లో నాగేశ్వరరావు స్వయంగా చిత్ర నిర్మాణాలు చూసుకునే వారు.. ఆ తర్వాత ఆ బాధ్యతలు తన కొడుకు నాగార్జున స్వీకరించారు.
కుమారుల చేతికి బాధ్యతలు
నాగార్జున కూడా ఆ బ్యానర్ లో ఎన్నో అద్భుతమైన చిత్రాలను నిర్మించి ఆ సంస్థను మరింత అగ్రపథాన నిలిపారు. ఇక అప్పుటి నుండి ఇప్పటివరకు ఆ స్టూడియోకి సంబంధించి అన్ని విషయాలు నాగార్జునే చూసుకునేవారు. అయితే తాజాగా టాలీవుడ్ సమాచారం ప్రకారం ఆ స్టూడియో బాధ్యతలు తన తనయుల చేతికి దాదాపుగా చేరిందని అంటున్నారు.
సినిమాల నిర్మాణం చూసుకుంటున్న చై-సామ్
తన పెద్ద కుమారుడైన నాగ చైతన్య - సమంతలు ఆ బాధ్యలు తీసుకున్నారని అంటున్నారు. అయితే ప్రస్తుతం ఈ బ్యానర్ లో సుశాంత్ హీరోగా "చి ల సౌ" చిత్రాన్ని తెరకెక్కించారు. దానికి సంబంధించి చైతన్య దంపతులు విరివిగా ప్రమోషన్లు చేస్తున్నారని.. సోషల్ మీడియాలో కూడా ప్రచారం చేస్తున్నారని.. ఇక రిలీజ్ కు ముందు ఈ చిత్రానికి మరింత హైప్ తీసుకుని రావాలని చూస్తున్నారట. ఇక రాబోయే రోజుల్లో అన్నపూర్ణ బ్యానర్ లో వచ్చే సినిమాలన్నీ వారే దగ్గరుండి చూసుకుంటారని సమాచారం. అయితే మరి ఇందులో ఎంతవరకు నిజముందో తెలియాలంటే వారి నుండి అధికారిక ప్రకటన వచ్చేవరకు వేచిచూడవలసిందే.