నట శేఖరుడు, సూపర్ స్టార్ కృష్ణ గారు ఆయన కెరీర్లో నటుడిగా 350 చిత్రాలు దాటగలిగారు అంటే నాటి తరం ప్రేక్షకులకు ఆశ్చర్యం కలగదు కానీ నేటి తరం ప్రేక్షకులకు మాత్రం పెద్ద విడ్డూరంగా అనిపిస్తుంటుంది. ఇక ఇప్పుడు మెగా స్టార్ చిరంజీవి 150 వ చిత్రం, నట సింహం బాల కృష్ణ 100 వ చిత్రాలకి చేరుకుంటేనే చాలా అరుదైన సంచలనంగా పరిగణిస్తున్నాం. ఇందుకు కారణం కృష్ణ గారి తరువాతి తరం నటులు డబల్ కాల్ షీట్స్ తో చిత్రీకరణలలో పాల్గొనలేకపోవటమే. ఏడాదికి ఒకసారి మాత్రమే ప్రేక్షకులను పలకరించినా పరవాలేదు కానీ ఆ ఒక్కసారి మాత్రం మళ్లీ ఏడాది పాటు గుర్తుండిపోయేలా పలకరించాలనుకుంటున్నారు నేటి తరం యువ కథానాయకులు. అందుకే కథ చర్చల్లోనే యువ స్టార్ హీరోస్ దాదాపు రెండు నెలలు పైన గడుపుతున్న పరిస్థితులు చూస్తున్నాం. ఈ తరుణంలో యువ కథానాయకుడు నారా రోహిత్ ఈ ఏడాది ఏకంగా ఆరో విడుదలకు సిద్దమైపోయాడు.
2016 ప్రథమార్ధంలో నారా రోహిత్ నటించిన తుంటరి, సావిత్రి, రాజా చెయ్యి వేస్తే చిత్రాలు విడుదల కాగా ద్వితీయార్ధంలో జ్యోఅచ్చుతానంద, శంకర విడుదలయ్యాయి. ఈ శుక్రవారం(డిసెంబర్ 30 ) నారా రోహిత్, శ్రీ విష్ణు లు నటించిన అప్పట్లో ఒకడుండేవాడు చిత్రం విడుదలకు అన్ని ఏర్పాట్లు పూర్తయిపోయాయి. ఇక ఈ చిత్ర ప్రచార కార్యక్రమాలలో బిజీగా వున్న రోహిత్ అప్పట్లో ఒకడుండేవాడు చిత్రం పై ప్రగాఢ నమ్మకంతో వున్నాడు. ఈ ఏడాది ఆయన నటించిన గత ఐదు చిత్రాలకంటే ఎంతో గొప్పగా ఉంటుంది అని భరోసా ఇస్తున్నాడు. రోహిత్ కెరీర్లో జ్యోఅచ్చుతానంద మెమొరబుల్ ఫామిలీ హిట్ గా నిలవగా, ఇప్పుడు రోహిత్ అప్పట్లో ఒకడుండేవాడు చిత్రం ఈ ఏడాది సినిమాలలోనే ది బెస్ట్ అని అభివర్ణించడం తో అంచనాలు పెరుగుతున్నాయి. మరి రోహిత్ 2016 సెండ్ ఆఫ్ మూవీ ఎలా వుండబోతుందో చూద్దాం.