Konda Murali : కొనసాగుతూనే ఉన్న "కొండా" ఎపిసోడ్.. ఎండ్ కార్డు పడదా?

దీంతో వరంగల్ లోని కాంగ్రెస్ ఎమ్మెల్యేలు సమావేశమై పార్టీ నాయకత్వానికి లేఖ రాశారు. కొండా మురళి వల్ల పార్టీ పరిస్థితి మరింత దిగజారుతుందని చెప్పారు. సొంత పార్టీ నేతలపై కొండా మురళి చేసిన విమర్శలను కూడా వీడియోలు, పత్రిక క్లిప్పింగ్ లను సమర్పించారు. కొండా మురళి పై చర్యలు తీసుకోవాలని కరారు. బస్వరాజు సారయ్య ఏకంగా కొండా మురళిపై పార్టీ హైకమాండ్ కు లేఖ రాశారు. మరోవైపు తాను గత ఎన్నికల్లో పదహారు ఎకరాలు అమ్మి 70 కోట్ల రూపాయలు ఖర్చు చేశానని కొండా మురళి చేసిన వ్యాఖ్యలు కూడా కలకలం రేపాయి. దీనిపై కేంద్ర ఎన్నికల కమిషన్ తో పాటు పార్టీ హైకమాండ్ కు కూడా కొందరు ఫిర్యాదు చేయడానికి రెడీ అవుతున్నారు.

ఈరోజు కొండా మురళి దంపతులు పార్టీ వ్యవహారాల ఇన్ ఛార్జి మీనాక్షి నటరాజన్ ను కలిశారు. తాను బీసీ వర్గానికి చెందిన నాయకుడినని, తాను వరంగల్ జిల్లాలోని అన్ని నియోజకవర్గాలలో గెలిపించుకుని వస్తానని కొండా మురళి తర్వాత మీడియా ఎదుట వ్యాఖ్యానించారు. తాను ఎవరికీ భయపడబోనని, తనపై కొందరు కావాలని కుట్ర చేస్తున్నారన్న కొండా మురళి పార్టీ హైకమాండ్ నిర్ణయం తనకు శిరోధార్యం అంటూనే తన కుమార్తె పరకాల టిక్కెట్ ను కోరుకోవడంలో తప్పేముందని ప్రశ్నించారు. అది ఆమె వ్యక్తిగతమని అన్నారు. ఈ నెల 5వ తేదీ లోపు కొండా మురళిపై చర్యలు తీసుకోకుంటే తాము హైకమాండ్ దృష్టికి తీసుకెళతామని వరంగల్ కాంగ్రెస్ నేతలు చెబుతున్నారు. మొత్తం మీద కొండా ఎపిసోడ్ కొనసాగుతూనే ఉన్నట్లుంది.