Visakha : విశాఖ భూ పందేరం.. కూటమికి తలనొప్పిగా మారనుందా?

గతంలో చంద్రబాబు హయాంలోనే గీతం విద్యాసంస్థలకు 70 ఎకరాల ప్రభుత్వ భూములను గీతం విద్యాసంస్థలకు అప్పగించారని, ఇప్పుడు యాభై ఎకరాలను అప్పగించారని చెబుతున్నారు. మొత్తం 120 ఎకరాల ప్రభుత్వ భూమిని ఇలా ఒక విద్యాసంస్థకు అప్పగించడమేంటని వైసీపీ ఉత్తరాంధ్రలో ఆందోళనలకు దిగుతుంది. ఒకరకంగా ఉత్తరాంధ్ర లో కూటమి ప్రభుత్వానికి గీతం భూముల వ్యవహారం తలనొప్పిగా మారే అవకాశాలున్నాయన్న విశ్లేషణలు వినపడుతున్నాయి. గతంలోనూ దస్ పల్లా భూములు, హయగ్రీవా భూముల విషయంలో వైసీపీ ఇదే రకమైన ఆరోపణలు ఎదుర్కొని గత ఎన్నికల్లో రాజకీయ ఇబ్బందులు పడిన విషయాలను కొందరు గుర్తు చేస్తున్నారు.

మాజీ ఐఏఎస్ అధికారి ఈఏఎస్ శర్మ ఇప్పటికే గీతం భూముల అప్పగింతపై పర్యావరణ శాఖతో పాటు న్యాయస్థానాన్ని కూడా ఆశ్రయించారు. అలాగే కమ్యునిస్టులు కూడా గీతం భూములకు భూపంపిణీ వ్యవహారంపై ఆందోళన చేస్తున్నారు. ఇలా కూటమి ప్రభుత్వానికి గీతం భూముల పంపిణీ ఇబ్బందికరంగా మారుతున్న తరుణంలో పార్లమెంటు సభ్యుడు, గీతం విద్యాసంస్థల అధినేత శ్రీభరత్ మాత్రం ఆ భూముల విలువ కేవలం వెయ్యి కోట్ల రూపాయలు మాత్రమేనని, తాము కరోనా సమయంలోనూ అనేక మందిని ఆదుకున్న విషయాన్ని కూడా గుర్తు చేస్తున్నారు. తమది సేవాసంస్థ అని ఆయన చెబుతున్నారు. ఎవరెన్ని చెప్పినప్పటికీ గీతం వ్యవహారం కూటమి ప్రభుత్వానికి మాత్రం రాజకీయ ఇబ్బందులను తెచ్చి పెడుతుందనడంలో సందేహం లేదు. ప్రభుత్వం ఈ ఆందోళనలతో కొంత డైలామాలో పడినట్లు తెలిసింది.