Summer Effect : ఇవేం ఎండలు రాబాబు.. కింద మంట పెట్టినట్లుందిగా

మార్చి నెలలోనే ఎండల తీవ్రత ఇంత ఎక్కువగా ఉండటంతో ఇక ఏప్రిల్, మే నెలలో ఏ స్థాయిలో ఉంటాయో అని ఊహించుకుంటేనే శరీరం చెమటలు కక్కుతుంది. ఎందుకంటే ఈ ఏడాది రోహిణి కార్తెలో యాభై డిగ్రీలు దాటే అవకాశముందని కూడా భావిస్తున్నారు. వర్షాలు కురిసిన తర్వాత ఒక్కసారిగా ఎండల తీవ్రత ఎక్కువ కావడంతో ప్రజలు మరింత రోగాల బారిన పడుతున్నారు. వైరల్ ఫీవర్ తో పాటు జలుబు, దగ్గు వంటి వ్యాధులతో ఆసుపత్రుల్లో చేరిపోతున్నారు. హైదరాబాద్ నగరంలోని ప్రభుత్వ, ప్రయివేటు ఆసుపత్రుల్లో ఓపీ తో పాటు ఇన్ పేషెంట్ల సంఖ్య కూడా ఎక్కువయిందని వైద్యులు తెలిపారు. తగిన జాగ్రత్తలు తీసుకోకుండా ఎండల్లో తిరిగితే వడదెబ్బ తగులుతుందని హెచ్చరిస్తున్నారు.

ఈ ఎండాకాలం గుండె పోటు మరణాలు కూడా ఎక్కువగా ఉంటున్నాయని వైద్యులు తెలిపారు. ఎక్కువ మంది గుండెపోటుతో మరణించే వారి సంఖ్య ఎక్కువగా ఉంది. ఇక తాజాగా వాతావరణ శాఖ ఎండలు మరింత తీవ్రమవుతాయని హెచ్చరించింది. ఏపీ, తెలంగాణలలో సాధారణం కంటే రెండు నుంచి మూడు డిగ్రీల ఉష్ణోగ్రతలు పెరుగుతాయని తెలిపింది. తేమ లేకపోవడంతో నాలుక పిడచకట్టుకపోతుంది. ఆంధ్రప్రదేశ్ లో 181 ప్రాంతాల్లో ఉష్ణోగ్రతలు 40 డిగ్రీలు దాటాయి. అనేక మండలాల్లో తీవ్ర వడగాలులు వీస్తున్నాయి. అలాగే హైదరాబాద్‌లో మరింత ఉష్ణోగ్రతలు పెరగనున్నాయని వాతావరణ శాఖ తెలిపారు. తెలంగాణలోని 23 జిల్లాలకు ఆరెంజ్‌ అలర్ట్ జారీ చేసింది. తెలంగాణలో వడగాలుల తీవ్రత పెరిగే అవకాశం ఉందని వాతావరణ శాఖ హెచ్చరించింది.