Weather Report : రెండు రోజులు కూల్ వాతావరణం.. ఈదురుగాలులతో కూడిన వర్షాలు

కానీ అదే సమయంలో ఈదురుగాలులు వర్షంతో పంటలు దెబ్బతింటున్నాయి. ముఖ్యంగా, మామిడి, మొక్కజొన్న అరటి, బత్తాయి, నిమ్మ వంటి తోటలు దారుణంగా రెండు రాష్ట్రాల్లో దెబ్బతిన్నాయి. వడగళ్ల వానలు కూడా పడటంతో రైతులు ఇబ్బందులుపడుతున్నారు. రెండు రాష్ట్రాల ముఖ్యమంత్రులు పంటల్లో నష్టపోయిన రైతులను ఆదుకునేందుకు ఇరు రాష్ట్రాల ముఖ్యమంత్రులు ఉన్నతాధికారులతో సమీక్ష నిర్వహించి సహాయం అందిస్తామని భరోసాఇచ్చారు. ఈరోజు, రేపు కూడా వర్షాలు, ఈదురుగాలులు వీస్తాయని తెలియడంతో ముఖ్యంగా మామిడి రైతులు ఆందోళన చెందుతున్నారు. పూత రాలిపోతుందని, కాయలు కూడా గాలుల దెబ్బకు పడిపోతుండటంతో తమకు తీవ్రమైన నష్టం సంభవిస్తుందని తెలిపారు.

ద్రోణి ప్రభావంతో రెండు రాష్ట్రాల్లో సోమ, మంగళవారాల్లో వర్షాలు పడతాయని వాతావరణ శాఖ తెలిపింది. ఉత్తరాంధ్ర, రాయలసీమ జిల్లాల్లో వర్షాలు పడతాయని తెలిపింది. ఉరుములు, పిడుగులతో కూడిన వర్షాలు పడతాయని హెచ్చరించింది. తెలంగాణలోని నల్లగొండ, వరంగల్, జనగామ, సిద్ధిపేట, రంగారెడ్డి, హైదరాబాద్, ఆసిఫాబాద్, మంచిర్యాల, జగిత్యాల, సిరిసిల్ల, కరీంనగర్, భూపాలపల్లి, ములుగు, భద్రాద్రి జిల్లాలకు వాతావరణ శాఖ ఎల్లో అలెర్ట్ జారీ చేసింది. ఉష్ణోగ్రతలు కనిష్టంగానే నమోదవుతాయని తెలిపింది.