తిరుపతి వెళ్లే భక్తులకు శుభవార్త: హైదరాబాద్ నుంచి 32 ప్రత్యేక రైళ్లు..

శ్రీవారి దర్శనార్థం తిరుమలకు వెళ్లే భక్తులకు సంతోషకర సమాచారం. వేసవి సెలవులు, పెరిగిన ప్రయాణికుల రద్దీ నేపథ్యంలో దక్షిణ మధ్య రైల్వే ఓ కీలక ప్రకటన చేసింది. హైదరాబాద్ నుంచి తిరుపతి దిశగా ప్రయాణించే భక్తుల కోసం మొత్తం 32 ప్రత్యేక రైళ్లను అందుబాటులోకి తీసుకొస్తున్నట్లు తెలిపింది.

ఈ ప్రత్యేక రైళ్లు ఏప్రిల్‌ నుంచి మే 23వ తేదీ వరకు వారానికి రెండు సార్లు నడుస్తాయని రైల్వే అధికారులు తెలిపారు. చర్లపల్లి నుంచి నెంబర్ 07017 రైలు ప్రతి శుక్రవారం మరియు ఆదివారం నడుస్తుంది. తిరుపతి నుంచి 07018 రైలు ప్రతి శనివారం మరియు సోమవారం తిరుగు ప్రయాణం చేస్తుంది.

ఈ రైళ్లు మల్కాజిగిరి, కాచిగూడ, మహబూబ్‌నగర్, జడ్చర్ల, డోన్, కడప, రేణిగుంట స్టేషన్లలో ఆగుతాయి. చర్లపల్లి నుంచి ఈ రైలు ఉదయం 9:35 గంటలకు బయలుదేరి, తిరుపతికి చేరుకుంటుంది. తిరుపతి నుంచి తిరుగు ప్రయాణం సాయంత్రం 4:40 గంటలకు ప్రారంభమవుతుంది.

భక్తుల సౌకర్యార్థం వేసవి కాలంలో చేపట్టిన ఈ చర్యతో, ప్రయాణం మరింత సౌకర్యవంతంగా మారనుంది.