ఆత్మగౌరవానికే మునుగోడు ప్రజలు పట్టం: కేటీఆర్

తొమ్మిది రాష్ట్రాల్లో ప్రభుత్వాన్ని కూల్చి వేయడమే కాకుండా తెలంగాణలోనూ కూల్చేందుకు ప్రయత్నించిన బీజేపీ అహంకారాన్ని మునుగోడు ప్రజలు తొక్కేశారన్నారు. బీజేపీ వందల కోట్ల రూపాయలు ఖర్చు పెట్టినా ప్రజాతీర్పును పొందలేకపోయిందన్నారు. ఈ ఎన్నికను బీజేపీ డబ్బుమయం చేసిందన్నారు. ఢిల్లీ నుంచి డబ్బు సంచులు తెచ్చారన్నారు. కోట్ల రూపాయల బీజేపీ నేతల డబ్బు పోలీసులకు దొరికిపోయిందన్నారు. అనేక సందర్భాల్లో బీజేపీ నేతల అనుచరుల నుంచి పోలీసులు స్వాధీనం చేసుకోవడం నిజం కాదా? అని ఆయన ప్రశ్నించారు.

జనం గొంతునొక్కాలని బీజేపీ ప్రయత్నించిందన్నారు. కేంద్ర దర్యాప్తు సంస్థలను వినియోగించి భయభ్రాంతులకు గురిచేసిందన్నారు. వందల కోట్లు ఖర్చు చేసినా ఆ పార్టీ గెలవలేకపోయిందన్నారు. లేకుంటే తమ పార్టీకి మరిన్ని ఓట్లు రావాల్సి ఉందని, మెజారిటీని తగ్గించగలిగారని కేటీఆర్ అన్నారు. తమను దెబ్బతీయడానికి తమ అనుచరులను రంగంలోకి దించిందన్నారు. రోడ్డురోలర్, చపాతీ రోలర్ వంటి గుర్తులకు ఐదు వేల ఓట్లు పై చిలుకు వచ్చాయని తెలిపారు. అందుకే మెజారిటీ తమకు తగ్గిందన్నారు కేటీఆర్. బీజేపీ ఒక ఫేక్ పార్టీ అని కేటీఆర్ మండి పడ్డారు. వామపక్షాలతో భవిష్యత్ తో పొత్తు విషయంపై తమ పార్టీ అధినేత నిర్ణయం తీసుకుంటారని ఆయన తెలిపారు.