Summer Effect : ఎండల మధ్య వానలు.. ఒకింత రిలీఫ్

ఆంధ్రప్రదేశ్ లో గరిష్టంగా ఉష్ణోగ్రతలు నమోదవుతున్నాయి. మరొకవైపు బంగాళాఖాతంలో ఏర్పడిన ఉపరితల ఆవర్తనం, ద్రోణి ప్రభావంతో వానలు పడతాయని అమరావతి వాతావరణ శాఖ అంచనా వేసింది. రానున్న మూడు రోజుల పాటు అక్కడకక్కడ తేలిక పాటి వానలు పడతాయని చెప్పింది. ఉత్తర కోస్తా ప్రాంతంలో తేలికపాటి నుంచి మోస్తరు వానలు పడతాయని, నలభై నుంచి యాభై కిలోమీటర్ల వేగంతో ఈదురుగాలులు వీస్తాయని తెలిపింది. దక్షిణ కోస్తా ప్రాంతంలో భారీ వానలు పడతాయని చెప్పింది. రాయలసీమలో ఉరుములు, మెరుపులతో కూడిన వానలు పడతాయంది.

తెలంగాణలోనూ పలు ప్రాంతాల్లో వానలు పడతాయని హైదరాబాద్ వాతావరణ శాఖ అధికారులు అంచనా వేశారు. కొన్ని చోట్ల పిడుగులు కూడా పడతాయని, ప్రధానంగా పొలాలకు వెళ్లే రైతులు, పశువుల కాపర్లు తగిన జాగ్రత్తలు తీసుకోవాలని సూచించింది. మరికొన్ని చోట్ల వడగళ్ల వానలు కురిసే అవకాశముందని చెప్పింది. హైదరాబాద్ తో పాటు పలు జిల్లాల్లో గరిష్ట ఉష్ణోగ్రతలు నమోదవుతాయని కూడా హైదరాబాద్ వాతావరణ శాఖ అధికారులు అంచనా వేశారు. వేడిగాలులు, ఉక్కపోతతో ఇప్పటికే తెలంగాణలో ప్రజలు ఇబ్బందులు పడుతున్నారు. విద్యుత్తు వినియోగం కూడా గణనీయంగా పెరిగిందని విద్యుత్తు శాఖ అధికారులు తెలిపారు.