Telangana : గుడ్ న్యూస్.. ఇక వారి ఖాతాల్లో లక్ష రూపాయల నగదు

ఇప్పటికే దీనికి సంబంధించి అధికారులు కసరత్తులు మొదలుపెట్టినట్లు తెలిసింది. ఆరు గ్యారంటీలలో ఒకటయిన కల్యాణ లక్ష్మి కోసం చాలా మంది నిరుపేదలు ఇప్పటికీ ఎదురు చూస్తున్నారు. కల్యాణ లక్ష్మితో పాటు షాదీముబారక్ పథకాలను అమలు చేసేందుకు ప్రభుత్వం సిద్ధమవుతుంది. నిధుల కొరత కారణంగానే ఇప్పటి వరకూ ఈ పథకాన్ని అమలు చేయలేకపోయింది. ఇక రెండేళ్లు దాటడంతో ఈ మాఘమాసంలో పెళ్లిళ్లు చేసుకునే నిరుపేదలైన కుటుంబానికి లక్ష రూపాయలను ఈ పథకం కింద చెల్లించనున్నట్లు సమాచారం. అయితే గత ప్రభుత్వం విధించిన నిబంధనలు మాత్రమే ఇప్పుడు కూడా అమలు చేయాలని ఈ ప్రభుత్వం ఒక నిర్ణయానికి వచ్చినట్లు అధికారిక వర్గాలు వెల్లడించాయి.

కల్యాణ లక్ష్మి పథకం పేరును కల్యాణమస్తుగా మారుస్తూ ప్రభుత్వం నిర్ణయం తీసుకుంది. కాంగ్రెస్ ఎన్నికలకు ముందు వాగ్దానమిచ్చినట్లుగా తులం బంగారం ఇవ్వాలంటే సాధ్యం కాదని, అయితే లక్ష రూపాయలు గత ప్రభుత్వం ఇచ్చినట్లే ఇవ్వాలా? లేకుంటే మరో పాతికవేలు అదనంగా కలిపి ఇవ్వాలా? అన్న దానిపై ముఖ్యమంత్రి విదేశీ పర్యటన నుంచి వచ్చిన తర్వాత నిర్ణయం తీసుకునే అవకాశముందని చెబుతున్నారు. మాఘమాసం ఫిబ్రవరి నెల నుంచి మొదలవుతుండటంతో అప్పటి నుంచి పెళ్లిళ్లు చేసుకున్న వారికి మాత్రమే ఈ పథకం వర్తించేలా నిబంధనలను రూపొందిస్తున్నారు. అంతే తప్ప గతంలో పెళ్లిళ్లు చేసుకున్న వారికి ఈ పథకం వర్తించకపోవచ్చు. అయితే దీనిపై ఇంకా ప్రభుత్వం నుంచి క్లారిటీ రావాల్సి ఉంది.