Telangana : రేపు బ్యాంకు ఖాతాల్లో నగదు జమ.. పడకుంటే మీరు ఇలా చేయొచ్చు

ఈరోజు ఆదివారం కావడంతో బ్యాంకులకు సెలవు దినం కావడంతో రేపటి నుంచి బ్యాంకుకు వెళ్లి రైతుభరోసా, ఆత్మీయ భరోసా కింద ఆరు వేల రూపాయల నగదు జమ అయిందా? లేదా? అన్నది తెలుసుకునే వీలుంది. ఈరోజు చెక్కులు పంపిణీ చేయడంతో రేపు వాటిని బ్యాంకులో జమ చేసుకోవచ్చు. ఇందిరమ్మ ఇళ్ల పథకానికి అర్హులైన వారికి కూడా చెక్కుల పంపిణీ కార్యక్రమాన్ని ప్రారంభించడంతో రేపు చెక్కులను బ్యాంకులో వేసుకుని వాటిని నగదుగా మార్చుకున్నతర్వాత ఇళ్ల నిర్మాణాలను ప్రారంభించుకోవచ్చు. మంచిముహూర్తాలు కూడా గురువారం నుంచి ప్రారంభం కానుండటంతో ఇక ఇళ్ల నిర్మాణ పనులను ప్రారంభించుకునే వీలుంది. తొలి విడతగా సొంత జాగా ఉన్న వారికి మాత్రమే ఇవ్వడంతో ఇళ్ల నిర్మాణం ప్రారంభించుకోవడం వెంటనే వీలవుతుంది.

అయితే రైతు భరోసా, ఆత్మీయ భరోసాకు సంబంధించిన నిధులు మాత్రం అర్హులైన లబ్దిదారుల ఖాతాల్లో రేపటి నుంచి ఒక్కొక్కరికి తొలి విడతగా ఆరువేల రూపాయలు జమ అవుతాయి. అయితే రేపు నగదు జమ కాకుంటే వెంటనే మండలంలోని అధికారిని సంప్రదించవచ్చని అధికారులు తెలిపారు. ఇక ఈ నాలుగు పథకాలకు సంబంధించి ఇప్పటికే అనేక మంది దరఖాస్తు చేసుకున్నారు. వారిలో అర్హులైన లబ్దిదారులను గుర్తించేందుకు, అంటే వడపోత పోసేందుకు కొంత సమయం పట్టే అవకాశాలున్నాయి. అందువల్ల దరఖాస్తు చేసుకున్న వారందరికీ మార్చి 31వతేదీ వరకూ నగదు జమ కాకపోయినా, సంక్షేమ పథకాలు అందకపోయినా వెంటనే సంబంధింత అధికారిని సంప్రదించి అందుకు గల కారణాలను తెలుసుకునే వీలుంటుందని ప్రభుత్వం తెలిపింది. ఇది నిరంతర ప్రక్రియ అని ఎవరూ ఆందోళన చెందాల్సిన అవసరం లేదని తెలిపింది.